მსოფლიოს ბევრ ქვეყანაში მაისი აღიარებულია მწვანე ბაფთის თვედ, რაც მიზნად ისახავს ცნობიერების ამაღლებას ფსიქიკური ჯანმრთელობის შესახებ.
მწვანე ბაფთის კამპანია ემსახურება ფსიქიკური პრობლემების მიმართ ტოლერანტობის ზრდას და სტიგმის შემცირებას.
ფონდმა „გლობალური ინიციატივა ფსიქიატრიაში - თბილისი“ დაიწყო საინფორმაციო კამპანია „მწვანე ბაფთა 2018“, რომლის მთავარი გზავნილია ფსიქიკურ ჯანმრთელობაზე ზრუნვა და სტრესის პრევენცია. 13 მაისს, ფონდის ოფისში მედიასემინარი გაიმართა შემდეგ თემებზე: როგორ დავიცვათ თავი პროფესიული სტრესისგან, როგორ ვიზრუნოთ ჩვენს ფსიქიკურ ჯანმრთელობაზე, როგორ უნდა დაგვეხმაროს უშუალო ხელმძღვანელი და მედიაორგანიზაცია სტრესულ გარემოში მუშაობის დროს.
მედიასემინარს უძღვებოდა პროფ. ჯანა ჯავახიშვილი, რომელმაც განაცხადა: „სასურველია, ჟურნალისტს ჰქონდეს სტრესთან გამკლავებისა და ემოციური თვითრეგულაციის საბაზო უნარ-ჩვევები, რამდენადაც ეს მისთვის, როგორც პროფესიულად, ასევე ცხოვრებისეულად მნიშვნელოვანი უნარ-ჩვევებია. ჟურნალისტის დაცვა პროფესიულ საქმიანობასთან დაკავშირებული სტრესისგან შეუძლია არა მარტო თავად ჟურნალისტს, არამედ იმ მედია ორგანიზაციას, რომელშიც ის მუშაობს“.
ჯანა ჯავახიშვილი - ფსიქოლოგი, მუშაობს ფსიქოტრავმატოლოგიის, ადიქტოლოგიისა და კონფლიქტის ტრანსფორმაციის საკითხებზე ფონდში „გლობალური ინიციატივა ფსიქიატრიაში - თბილისი“. ხელმძღვანელობს ადიქტოლოგიის სამეცნიერო-კვლევით ინსტიტუტს ილიას სახელმწიფო უნივერსიტეტში. არის ქართული ფსიქოტრავმის საზოგადოების პრეზიდენტი, ევროპის ტრავმული სტრესის კვლევის საზოგადოების დირექტორთა საბჭოს წევრი, ჟურნალისტიკისა და ტრავმის დარტ ცენტრის საკონტაქტო პირი სამხრეთ კავკასიაში.
მედიასემინარი ჩატარდა ევროკავშირის მიერ დაფინანსებული პროექტის „ფსიქიკური აშლილობების და ფსიქო-სოციალური ნიშნით შეზღუდული შესაძლებლობის მქონე პირთა უფლებების მხარდაჭერა საქართველოში“ ფარგლებში, რომელსაც ახორციელებს ფონდი „გლობალური ინიციატივა ფსიქიატრიაში - თბილისი“ პარტნიორებთან ერთად: „დემოკრატიის ინსტიტუტი“, „ალიანსი უკეთესი ფსიქიკური ჯანმრთელობისთვის“, „ჰელსინკის ადამიანის უფლებათა ფონდი“ (ვარშავა).
