„მომხდარზე პასუხისმგებლობა ეკისრება მმართველ გუნდს. 6 წელია ისინი არაფერს აკეთებენ ქვეყნის საკეთილდღეოდ, ვერც ერთი წარმატებული პოლიტიკური რეფორმა ვერ ვნახეთ, ყველაფერი ფასადურია, რის გამოც უნდა წავიდნენ ისინი. წუხელ ხელისუფლებამ გაიმეორა ის, რასაც აკეთებდა წინა ხელისუფლება. ეს არის დარტყმა ქართულ დემოკრატიაზე”, - განაცხადა აქციაზე „თეთრი ხმაურის“ მოძრაობის წევრმა, ბექა წიქარიშვილმა.
ამ წუთებში, რუსთაველის გამზირზე, პარლამენტის შენობის წინ აქცია მიმდინარეობს. შეკრებილები წუხელ კლუბ “ბასიანსა” და კლუბ “გალერიში” ჩატარებულ სპეცოპერაციას აპროტესტებენ. ისინი ქვეყნის პრემერ მინისტრის, გიორგი კვირიკაშვილისა და შს მინისტრის, გიორგი გახარას გადადგომას ითხოვენ.
ცნობისთვის, წუხელ კლუბ „ბასიანში“ და კაფე „გალერიში“ სპეცოპერაცია ჩატარდა, რის შედეგადაც დაკავებულია ნარკოტიკული საშუალების გამსაღებელი 8 პირი. სპეცოპერაცია გააპროტესტეს კლუბ „ბასიანში“ და კაფე „გალერიში“ მყოფმა პირებმა, ისე რიგითმა მოქალაქეებმა, რომლებმაც მოგვიანებით პარლამენტის შენობასთან გადაინაცვლეს. საპროტესტო აქციაზე ადმინისტრაციული წესით, ოფიციალურად დაკავებულია 20 პირი, თუმცა არაოფიციალური ინფორმაციით, დაკავებულთა რაოდენობა გაცილებით მეტია.
