„საერთაშორისო გამჭვირვალობა - საქართველომ“ დღეს საზოგადოებრივი აზრის გამოკითხვის შედეგები გამოაქვეყნა.
გამოკითხულთა 38% ფიქრობს, რომ აზერბაიჯანელი ჟურნალისტი აფგან მუხთარლი საქართველოდან მოიტაცეს, 6% კი ფიქრობს, რომ მან საზღვარი თავისი ნებით გადაკვეთა.
კვლევის თანახმად, 18%–ს მიაჩნია, რომ აზერბაიჯანელი ჟურნალისტი ქართულმა სპეცსამსახურებმა მოიტაცეს და აზერბაიჯანის სპეცსამსახურებს გადასცეს, 15% ფიქრობს, რომ მუხთარლი აზერბაიჯანელმა სპეცსამსახურებმა მოიტაცეს ქართული მხარის დახმარებით, 6%-ს მიაჩნია, რომ მან თვითონ გადაკვეთა საზღვარი, 5%–ს სჯერა, რომ აზერბაიჯანელმა სპეცსამსახურებმა მოიტაცეს, 36%–მა არ იცის, ხოლო 19%–ს არაფერი სმენია აფგან მუხთარლის შესახებ.
კვლევა „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა“ განახორციელა.
კვლევის ფარგლებში, რომელიც 2018 წლის 3-28 მარტის პერიოდში ჩატარდა, მთელი საქართველოს მასშტაბით 1843 ადამიანი გამოიკითხა. გამოკითხვის საშუალო ცდომილება 2,8 პროცენტს შეადგენს.
