პრეზიდენტს გაცილებით უფრო მეტი შეეძლო გაეკეთებინა ქვეყნისთვის, - ამის შესახებ პარლამენტის ვიცე-სპიკერმა გია ვოლსკიმ გიორგი მარგველაშვილთან დაკავშირებით განაცხადა.
მისი თქმით, იმ დაპირისპირების ხარისხი, რაც პრეზიდენტის ინსტიტუტსა და სახელისუფლებო სხვა რგოლებს შორის შეიქმნა, განსაკუთრებით დამაზიანებელი ბოლო ეტაპზე იყო.
„ამის მთავარი მიზეზი გარკვეული შინაგანი პერსონალური დამოკიდებულებაა საკითხებისადმი. სენტიმენტების დრო დღეს არ არის, ვფიქრობ, შეფასებები ობიექტური უნდა იყოს, რათა სახელმწიფომ და ამომრჩეველმა მომავლისთვის გაითვალისწინონ, თუ როგორი პრეზიდენტი გვჭირდება, სად არის სიმართლე და სად არასწორი დამოკიდებულება ქვეყნის წინაშე არსებული პრობლემების მიმართ”, – განაცხადა ვოლსკიმ.
შეგახსენებთ, გიორგი მარგველაშვილი პარლამენტის პლენარულ სხდომაზე წლიურ ანგარიშს დღეს წარადგენს.
