საქართველოს ყოფილი პრეზიდენტის, მიხეილ სააკაშვილის ადვოკატის დავით კაკოიშვილის განცხადებით, მათ მიერ დაყენებული შუამდგომლობა სხდომის გადადებასთან დაკავშირებით, საქმის გაჭიანურებას არ ემსახურება.
მისი განმარტებით, იმ შემთხვევაში თუკი აღნიშნული საქმე ქართულ მართლმსაჯულებაში სათანადო განაჩენს ვერ მიიღებს, სააკაშვილის საქმეს ადამიანის უფლებათა ევროპულ სასამართლოში წაიღებენ.
"ამ ინსტანციაში ჩვენი მიზანი საქმის გაჭიანურება არ არის, პირიქით, იმ შემთხვევაში თუკი საქართველოში ეს საქმე ვერ ნახავს მართლმსაჯულებას, განვიხილავთ შესაძლებლობას, რომ ადამიანის უფლებათა ევროპულ სასამართლოში წავიდეთ, სადაც ეს საქმე წარმატებით დასრულდება, ვინაიდან ეს საქმე სრულად უკანონო, პოლიტიკური და დაუსაბუთებელია. მასში სასამართლოს მიერ გატარებულია არამხოლოდ უკანონო და დაუსაბუთებელი მსჯელობები, არამედ სახიფათო, ოღონდ არა მიხეილ სააკაშვილის ან სხვა პირების მიმართ, არამედ საზოგადოებისთვის. ჩვენ მოვითხოვეთ გონივრული ვადა, საკმაოდ მცირე დრო იმისთვის, რათა ჩემს მიერ საქმის მასალების შესწავლა მოხდეს, რომელსაც აღარ ვესწრებოდი. ასევე უნდა გავეცნო სააპელაციო საჩივარს და შესაგებელს", - განაცხადა დავით კაკოიშვილმა.
რაც შეეხება სააკაშვილის პოზიციას ამ საქმესთან დაკავშირებით, როგორც ადვოკატი განმარტავს, ყოფილი პრეზიდენტის მოსაზრებით, ეს საქმე არის პოლიტიკური.
"ამ საქმესთან დაკავშირებით მიხეილ სააკაშვილის პოზიცია საყოველთაოდ ცნობილია. ის თვლის რომ ეს არის ცალსახად პოლიტიკური გადაწყვეტილება და ამ გადაწყვეტილებას სამართალთან არანაირი კავშირი არ აქვს. ამ გადაწყვეტილების მიზანს წარმოადგენს მხოლოდ ის, რომ მიხეილ სააკაშვილმა საქართველოში დაბრუნება ვერ შეძლოს, პოლიტიკურ პროცესებში აქტიურად ვერ ჩაერთოს და უკვე საქართველოდან ამ ხელისუფლებას ოპონირება ვერ გაუწიოს", - აღნიშნა კაკოიშვილმა.
თუ რა მოლოდინი აქვს სააკაშვილს თბილისის სააპელაციო სასამართლოსგან, როგორც ადვოკატი განმარტავს, პროგნოზის გაკეთება ნაადრევია.
"წინასწარ მოლოდინებს ვერ გეტყვით, ვიმეორებ - თუ საქართველოში სააპელაციო სასამართლო, შემდეგ კი უზენაესი სასამართლო სწორ და კანონიერ გადაწყვეტილებას არ მიიღებს, ჩვენ განვიხილავთ შესაძლებლობას, ეს საქმე წავიდეს სტრასბურგის სასამართლოში, რომლის პრაქტიკასაც პირდაპირ ეწინააღმდეგება მოსამართლე გიორგი არევაძის მთელი რიგი მსჯელობები, რომელიც მის გადაწყვეტილებაშია ასახული", - დასძინა კაკოიშვილმა.