ჩვენ რა თქმა უნდა, როგორც დაგეგმილი გვქონდა, პირველ სამუშაო ჯგუფში მთავარი აქცენტი გავაკეთეთ არჩილ ტატუნაშვილის საქმეზე, რაზეც სამწუხაროდ, როგორც მოსალოდნელი იყო, ვერაფერი შინაარსიანი ვერ მოვისმინეთ და ვერ გავიგეთ ვერც რუსეთის, ვერც ცხინვალის წარმომადგენლებისაგან, - ამის შესახებ საგარეო საქმეთა მინისტრის მოადგილე დავით დონდუამ ჟენევაში განაცხადა.
მისი თქმით, ცხინვალის წარმომადგენლებმა იგივე განცხადება წაიკითხეს, რასაც თავის დროზე აკეთებდნენ - სრულიად აბსურდული.
"ცხინვალის წარმომადგენლებმა იგივე განცხადება წაიკითხეს, რასაც თავის დროზე აკეთებდნენ, სრულიად აბსურდული, ანუ ახალი ამის თაობაზე არაფერი თქმულა. ჩვენი და ამერიკელი თანათავმჯდომარეების მხრიდან ძირითადი დრო ამ საკითხის განხილვას დაეთმო, თუმცა როგორც გითხარით, ცხინვალის და რუსეთის წარმომადგენლებს არაფერი სათქმელი ამასთან დაკავშირებით სამწუხაროდ, არ ჰქონდათ“, - განაცხადა დონდუამ, რომელმაც აქვე აღნიშნა, რომ ფაქტია, ადამიანი არის ნაწამები და ახლა უნდა მოხდეს ამის გამოძიება და ის ვინც არის დამნაშავე, უნდა წარსდგეს სასამართლოს წინაშე.
“აქ სასამართლო პროცესი არ არის. ჩვენ ვამტკიცებთ იმას, რომ მოხდა მკვლელობა, ადამიანის სიცოცხლის ხელყოფა, რომელიც უკანონოდ იყო დაკავებული. ახლა ჩვენთან მიმდინარეობს გამოძიება, რომელიც უნდა დასრულდეს და არავინ ხელი არ უნდა შეუშალოს მის დასრულებას. ფაქტი ერთია, რომ ადამიანი არის ნაწამები და ახლა უნდა მოხდეს ამის გამოძიება და ის ვინც არის დამნაშავე, უნდა წარსდგეს სასამართლოს წინაშე. რასაც გამოძიება არ სჭირდება, ეს არის ის, რომ პოლიტიკური პასუხისმგებლობა უნდა აიღოს იმან, ვინც არის ეფექტური კონტროლის განმახორციელებელი, ეს არის რუსეთის ფედერაცია. ჩვენი განცხადების ადრესატები იყვნენ სწორედ რუსეთის წარმომადგენლები. გითხარით, რომ არც რუსეთს აუღია არანაირი ვალდებულება და არც ცხინვალის წარმომადგენლებისგან მოგვისმენია რაიმე ახალი, გარდა იმისა, რასაც ისინი ბოლო ერთი თვის განმავლობაში ცდილობდნენ, რომ რაღაც განმარტება გაეკეთებინათ“, - დასძინა დონდუამ.
