ტერორისტული ორგანიზაციისთვის და ტერორისტებისთვის დახმარების გაწევაში ერთ-ერთი ბრალდებულის, რუსლან ალდამოვის ადვოკატის, მარიამ კუბლაშვილის თქმით, მისი დაცვის ქვეშ მყოფი უდანაშაულოა.
"პირდაპირ გამოვრიცხავ, რომ ჩემი დაცვის ქვეშ მყოფი გეგმავდა ტერორისტულ აქტს. ამ პირებს ისედაც არ აქვთ წაყენებული ბრალი იმ კუთხით, რომ მათ რაიმე მიზნები ჰქონდათ ტერორისტული აქტის მოწყობის, თუნდაც იმ ადამიანებს ვინც არიან ლიკვიდირებულები, მათ შორის საუბარია ჩატაევზე. საქართველოში რაიმე ტერორისტული აქტის დაგეგმვა გამორიცხულია. დღეს რაც საქმის მასალებში მტკიცებულებებია წარდგენილი, არ არის რელევანტური იმისთვის, რომ მაღალი ალბათობით იყოს ვარაუდი, რომ ბრალდებულებმა ჩაიდინეს დანაშაული. კავშირები, რომელიც ბრალდების მხარეს აქვს დადგენილი, იყო შემთხვევითი. ჩატაევის საქართველოში ყოფნის შესახებ ალდამოვმა არ იცოდა, ხოლო ინტერპოლის მიერ ძებნილი ადამიანების ქვეყანაში შემოსვლა გამოეპარა ხელისუფლებას და რატომღაც არ უნდა გამოპარვოდა პანკისის ხეობის მკვიდრ ახალგაზრდობას. ეს ადამიანები თავისუფლად გადაადგილდებოდნენ დუისში, მათ შორის პოლიციასთან და რეაქცია ამაზე არავის არ ჰქონდა",- განაცხადა კუბლაშვილმა.
ცნობისთვის, დაკავებული 8 პირიდან, 6 მათგანს ბრალი ტერორისტული ორგანიზაციის და ტერორისტებისთვის ხელშეწყობისთვის აქვს წაყენებული, ხოლო 2-ს ტერორისტული ორგანიზაციის წევრობისთვის.
