ბუტა რობაქიძის მკვლელობის საქმეზე სამსახურეობრივი უფლებამოსილების ბოროტად გამოყენების ნაწილში შსს-ს ყოფილი მაღალჩინოსნების სასამართლო პროცესი მთელი დღის განმავლობაში ხმაურის ფონზე მიმდინარეობდა.
როგორც პროცესის დასრულების შემდეგ ჟურნალისტებთან საქმის პროკურორმა, გიორგი ოსაძემ განაცხადა, კრიმინალური პოლიციის ყოფილმა უფროსმა, ზაზა ბაქრაძემ დღეს სასამართლოს მნიშვნელოვანი ჩვენება მიაწოდა.
„დღევანდელ სასამართლო სხდომაზე როგორც ბრალდების მოწმე, ბრალდების მხარემ ზაზა ბაქრაძე დაკითხა. მან სასამართლოს დეტალური ჩვენება მიაწოდა 2004 წლის 23-24 ნოემბერს განვითარებულ მოვლენებთან დაკავშირებით. კერძოდ, მან ისაუბრა, თუ როგორ და რა ვითარებაში მოხდა შემთხვევის ადგილზე იარაღების მიტანა, შემდგომ გადანაწილება და ვის რა როლი ჰქონდა. ამასთანავე, ისაუბრა ვიდეოჩანაწერზე, რომელიც დაცვის მხარეს აქვს წარმოდგენილი. აღნიშნული ვიდაოჩანაწერის გაკეთება რამდენიმე დუბლით და ინსცენირებით მოხდა. ამ ყველაფერს კი ბრალდებული გურგენ დონაძე უთითებდა. სწორედ გურგენ დონაძისა და ზურაბ მიქაძის მითითებით ხდებოდა შემთხვევის ადგილზე იარაღების ჩადება. ვაკე-საბურთალოს სამმართველოს უფროსი დავით იაშვილი, დიდუბე-ჩუღურეთის სამმართველოს უფროსი, ირაკლი ფირცხალავა, ასევე თავად კრიმინალური პოლიციის ყოფილი უფროსი, ზაზა ბაქრაძე და გურგენ დონაძე ესწრებოდნენ ყველაფერს. პირებისთვის, რომელთაც იარაღი საერთოდ არ ჰქონდათ უნდა მომხდარიყო ჩადება. რისი გადაწყვეტილებაც ერთობლივად მიიღეს“ - განაცხადა ბუტა რობაქიძის მკვლელობის საქმის პროკურორმა გიორგი ოსაძემ.
მისი განცხადებით, კრიმუნალური პოლიციის ყოფილი უფროსის ზაზა ბაქრაძის ჩვენება სანდოა, რადგან ის საქმეშო არსებულ მტკიცებულებებს ემთხვევა.
„ზაზა ბაქრაძის ჩვენების ნაწილი, რომელიც დღეს სასამართოლმ მოისმინა სრულ თანხვედრაშია საქმეზე დაკითხული მოწმეების მიერ მიცემულ ჩვენებასთან. მათ შორის პატრულ ინსპექტორების ჩვენებებთან რომლებიც ამბობენ, რომ თავდაპირველად შემთხვევის ადგილზე იარაღი არ ყოფილა და გარკვეული პერიოდის შემდეგ გაჩნდა. მისი ჩვენება აბსოლუტურ თანხევედრაშია ამოღებულ დეტალურ სატელეფონო ჩანაწერთან. აქედან გამომდინარე ზაზა ბაქრაძის ჩვენებასთან დაკავშირებით კითხვის ნიშანი არ არსებობს“ - განაცხადა პროკურორმა.
