თბილისის საქალაქო სასამართლოში ტერორისტული ორგანიზაციისათვის მომსახურების გაწევაში ბრალდებულების სასამართლო პროცესი მიმდინარეობს.
ცალკე წარმოებად გამოყოფილი 6 პირის სასამართლო პროცესზე ამ წუთებში შესვენებაა, რადგან ერთ-ერთმა ბრალდებულმა თარჯიმანი მოითხოვა. როგორც საქმის პროკურორი გიორგი კავსაძე აცხადებს, მტკიცებულებებით დადასტურდება ბრალდებულებისთვის წარდგენილი ბრალი.
„მტკიცებულებები რომელიც პროკურატურამ წარადგინა რა თქმა უნდა იმ პირების ბრალეულობას ადასტურებს, რომელთა მიმართაც საქმე განიხილება. მტკიცებულებებით დავადასტურებთ, რომ ამ პირებმა ნამდვილად ჩაიდინეს ის დანაშაული რასაც მათ ვედავებით“ - განაცხადა ახმედ ჩატაევთან კავშირში ბრალდებულების საქმის პროკურორმა.
როგორც ის განმარტავს, ბრალდებული 8 პირიდან ორი პირის საქემე ცალკე განიხილება, რადგან საქმე საკმაოდ მოცულობითა.
„დანიშნულია უამრავი ექსპერტიზა, რომელთა დასკვნის ნაწილი ჯერ კიდევ არ მიგვიღია. გამოძიებაში საქმე ორჯერ იქნა გაგრძელებული. პატიმრობის ვადითაც შეზღუდულები ვართ. შესაბამისად სასამართლოში საქმის უფრო მარტივად წარმართვის და დროის მოგების მიზნით იქნა მიღებული გადაწყვეტილება რომ ორი პირის საქმე ცალკე გამოყოფილიყო“ - განაცხადა პროკურორმა გიორგი კავსაძემ.
მისი განმარტებით, ცალკე გამოყოფილი ორი პირის საქმეზე საპროცესო გარიგებაზე საუბარს ადგილი არ ჰქონია და ეს არც ბრალდებულებს უთხოვიათ.