საქართველოს მთავარი პროკურორის, ირაკლი შოთაძის განცხადებით, „ქართული მარშის“ მიერ დაანონსებულ აქციასთან დაკავშირებით, სამართალდამცველი უწყებები მიიღებენ ადეკვატურ ზომებს, რათა მოხდეს ყველა შესაძლო დანაშაულის პრევენცია და მოქალაქეების უსაფრთხოება იქნას დაცული.
რაც შეეხება „ქართული მარშის“ დაკავებულ წევრებს, ირაკლი შოთაძის თქმით, მათ ბრალს დღეს წარუდგენენ, რის შემდეგაც პროკურატურა აღკვეთის ღონისძიების შეფარდებაზე სასამართლოს მიმართავს. მისივე განცხადებით, ეს იქნება პირველადი ბრალი და გამოძიება გაგრძელდება.
„ამ ეტაპისთვის ბრალდებულის სახით დაკავებულია ექვსი პირი. ბრალდების წარდგენა მოხდება დღეს, რის შემდეგაც პროკურატურა სასამართლოს მიმართავს აღკვეთის ღონისძიებაზე. კონკრეტული პირები უკვე დაკავებულები არიან. ამ წუთებში მიმდინარეობს შესაბამისი საგამოძიებო მოქმედებები. მოხდება საქმეში მოგროვილი მტკიცებულებების შეფასება და ამის გათვალისწინებით მოხდება ბრალის კვალიფიკაციის განსაზღვრა. ეს იქნება, რა თქმა უნდა, პირველადი ბრალი. გამოძიება გაგრძელდება და ის ქმედებები, რაც გამოიკვეთება, შესაძლო დანაშაულის ნიშნები თითოეული მათგანის მხრიდან, რა თქმა უნდა, ასახული იქნება ჩვენი ბრალდების დადგენილებაში“, – განაცხადა ირაკლი შოთაძემ.
