პრემიერ მინისტრმა პარლამენტში თვითმმართველობისა და დეცენტრალიზაციის ახალი კონცეფცია წარადგინა. გიორგი კვირიკაშვილის განცხადებით, რეგიონებს შორის უთანასწორობის პრობლემის აღმოფხვრა მნიშვნელოვანი გამოწვევაა.
მისი თქმით, რეგიონებში არსებული უთანასწორო მდგომარეობების გამო ბევრი ადამიანი ტოვებს სოფელს და მთავრობის პრიორიტეტია რეგიონებში ცხოვრების დონის უთანასწორობის აღმოფხვრა.
პრემიერის განცხადებით, დეცენტრალიზაციის გეგმა სამ დონეს მოიცავს.
„პირველი, ეს არის თვითმმართველობის უფლებამოსილებების გაფართოება, მეორე, ეს გახლავთ, თვითმმართველობას მეტი ეფექტიანობისთვის, რა თქმა უნდა, ჰქონდეს მეტი ფინანსური რესურსი, ამ ფინანსური რესურსის თანდათანობით გადანაწილებას თვითმმართველობის მიმართულებით და მესამე, თვითმმართველობა უნდა აკმაყოფილებდეს გამჭვირვალობის და ანგარიშვალდებულების უმაღლეს სტანდარტებს,“ - განაცხადა პრემიერმა.
პრემიერმა აღნიშნა, რომ რეფორმის განხორციელებისთვის სამოქალაქო სექტორის ჩართულობა აუცილებელია. კვირიკაშვილის თქმით, აღნიშნულ რეფორმაში პარლამენტს უმნიშვნელოვანესი როლი აკისრია.
