კომპანია გამოიყენებდა არაქარხნული წესით დამზადებულ მოაჯირებს და ხარაჩოებს, - ამის შესახებ ჯანდაცვის სამინისტროს შრომის ინსპექტირების დეპარტამენტის უფროსმა, ბექა ფერაძემ თბილისში მშენებარე კორპუსის მე-5 სართულიდან მუშის გადავარდნასთან დაკავშირებით განაცხადა.
მისი თქმით, პირველადი შეფასებით ფიქსირდება გარკვეული შრომის უსაფრთხოების სტანდარტების დაუცველობა. მისივე თქმით, შრომის ინსპექციის დეპარტამენტი უბედური შემთხვევის გამომწვევი მიზეზების დასადგენად შეისწავლის კომპანიის მხრიდან ეფექტური შრომის უსაფრთხოების პოლიტიკის გატარებას.
„კომპანია გამოიყენებდა არაქარხნული წესით დამზადებულ მოაჯირებს და ხარაჩოებს. ჩვენ შევისწავლეთ რამდენად ხდებოდა კომპანიის მხრიდან ეფექტური შრომის უსაფრთხოების პოლიტიკის წარმართვა, რაც გულისხმობს, საფრთხეების შეფასებას და რისკების იდენტიფიცირებას, რაც საბოლოო ჯამში მოგვცემს კომპლექსურად იმის საშუალებას, რომ აღვწეროთ, რას უკავშირდებოდა უბედური შემთხვევა", – განაცხადა ბექა ფერაძემ.
ცნობისთვის, დღეს, თბილისში, ჟვანიას ქუჩაზე მშენებარე კორპუსის მე-5 სართულიდან 26 წლის მუშა გადავარდა და ადგილზე დაიღუპა.
