უკრაინის გენერალური პროკურატურის ოფიციალურ ვებგვერდზე გამოქვეყნებული განცხადების თანახმად, უკრაინის გენერალური პროკურორი იური ლუცენკო 12 იანვარს, უკრაინაში, საქართველოს მთავარი პროკურორის მოადგილეს, გიორგი გოგაძეს შეხვდა.
„ღონისძიების დროს მხარეებმა ორმხრივი თანამშრომლობის ყველაზე აქტუალური საკითხები განიხილეს. კერძოდ, სისხლის სამართლის წარმოებისა და ექსტრადირების დროს საერთაშორისო-სამართლებრივი დახმარების კუთხით“, – ნათქვამია განცხადებაში.
ამასთან, გამოცემა „უკრაინსკაია პრავდას“ შეკითხვაზე, იყო თუ არა შეხვედრაზე განხილული მიხეილ სააკაშვილის ექსტრადირების საკითხი, უკრაინის გენერალური პროკურორის პრესმდივანმა, ლარისა სარგანმა განაცხადა, რომ იმაზე მეტს, რაც პროკურატურის განცხადებაშია ნათქვამი, ვერ იტყვის.
