,,ერთიანი ნაციონალური მოძრაობა” საქართველოს პრეზიდენტს სახელმწიფო დაცვის სპეციალური სამსახურის მიერ 2013 წელს გაწეული ხარჯების გასაჯაროებას სთხოვს.
აღნიშნულის თაობაზე წერილი პრეზიდენტის ადმინისტრაციაში, დღეს, ზაზა ბიბილაშვილმა შეიტანა. მისივე განმარტებით, ამ მოთხოვნის მიზეზი საქართველოს მესამე პრეზიდენტის წინააღდეგ აღძრული ერთ-ერთი სისხლის სამართლის საქმეა, სადაც ბრალდება საბიუჯეტო ხარჯების არამიზნობრივ ხარჯვას იძიებს.
„მიხეილ სააკაშვილს და გენერალ თემურ ჯანაშიას, რომელიც არის სახელმწიფო დაცვის სამსახურის ყოფილი უფროსი, ბრალად ედება სახელმწიფო სახსრების გაფლანგვა და გაფლანგვაში ითვლება ისეთი ხარჯები, როგორიც არის სომხეთის პირველი ლედისთვის ნაჩუქარი სუვენირი, უცხოური დელეგაციების მიღება და მათთვის მასპინძლობის გაწევა ამა თუ იმ კუთხეში. ბუნებრივია, ასეთი ხარჯები გაიწეოდა მას შემდეგაც, რაც ივანიშვილი მოვიდა ხელისუფლებაში. გაიწეოდა იმ პირების მიერ, რომელიც იქნენ დანიშნულნი ივანიშვილის მიერ, მაგრამ რატომღაც ჩვენი პროკურატურა მალავს ამ ხარჯებს,“ - განაცხადა ზაზა ბიბილაშვილმა.
