„სააკაშვილის ადვოკატებს თითქმის სამი წელი ჰქონდათ იმისთვის, რომ საქმის მასალებს გაცნობოდნენ და მეტი პასუხისმგებლობით მოჰკიდებოდნენ თავიანთი დაცვის ქვეშ მყოფის ინტერესებს“, - ამის შესახებ პროკურორმა, ირაკლი ნადარეიშვილმა საქართველოს ყოფილი პრეზიდენტის, მიხეილს სააკაშვილის პროცესზე დასკვნითი სიტყვის წარმოთქმის შემდეგ ჟურნალისტებს განუცხადა.
„ბრალდების მხარემ მიხეილ სააკაშვილის დაცვის მხარეს ბრალდების წაყენების მომენტიდან 2014 წლიდან გადასცა საქმის ყველა მასალა. ამ საქმეში მიხეილ სააკაშვილს, როგორც ბრალდებულს სამი ადვოკატი იცავდა ბექა ბასიალაია, ოთარ კახიძე და დავით კაკოიშვილი. მათ თითქმის სამი წელი ჰქონდათ იმისთვის, რომ საქმის მასალებს გაცნობოდნენ და მეტი პასუხისმგებლობით მოჰკიდებოდნენ თავიანთი დაცვის ქვეშ მყოფის ინტერესებს. თუკი მოსამართლის აცილების ასეთი გარემოება არსებობდა, მათ ჰქონდათ უფლება, აღნიშნული შუამდგომლობა დაეყენებინათ არა მაშინ, როცა ბრალდება ამბობდა დასკვნით სიტყვას, არამედ პირველივე სასამართლო სხდომაზე. ადვოკატის სიტყვები მოსამართლის მიმართ - თუ თქვენ არ დააკმაყოფილებთ შუამდგომლობას, მაშინ ჩვენ ასე მოვიქცევით და ა.შ.. შუამდგომლობის ფარგლებში არ ჯდება, ეს იყო შანტაჟის ელემენტებით და პოლიტიკური ნიუანსებით გაჯერებული განცხადებები. ადვოკატი თითქოს ანამუსებდა სასამართლოს და ბრალდების მხარეს თავის განცხადებაში. მას კეთილი უნდა ენება და თავის დროზე ენახა ეს მტკიცებულებები, როცა მას გადაეცა.
ვერცერთ რედაქციაში ვერ ნახავთ ჩანაწერს, სადაც თანაშემწის ინსტიტუტი იყოს მოხსენიებული, როგორც თვითაცილების ან აცილების საფუძველი“, - განაცხადა პროკურორმა.
მისივე თქმით, დაცვის მხარეს ერთადეთი მოწმე ჰყავდა - დათა ახალაია .
„დაცვის მხარე აცხადებს, რომ ბრალდების მხარე პროცესებს აჩქარებს. კითხვას ვსვამ , დავუშვათ პროცესებს არ ვაჩქარებთ, ვინ გყავთ სხვა რომ მოიყვანოთ? და მტკიცებულებათა ფორმით გამოიკვლიოთ? არცერთის სხვა მოწმე არ ჰყავთ სიაში და არცერთი სხვა დოკუმენტი არ იყო გამოსაკვლევი. ეს ყველაფერი თავის დროზე არ წარმოუდგენიათ. პირდაპირ გეტყვით, დათა ახალაიას სურვილი არ გასჩენია, თუმცა თავისი ძმის, ბაჩანა ახალაიას საქმეზე მიეცა ჩვენება, და ე.წ სიმართლე ეთქვა სასამართლოსთვის, არც თავისი მფარველის, ვანო მერაბიშვილის პროცესზე მიუცია ჩვენება. რატომღაც, ამ სასამართლო პროცესზე აღმოაჩნდა დათა ახალაიას სურვილი ჩართულიყო და სიმართლე ეღაღადა. რატომ ? პასუხი ძალიან მარტივია, თავის მფარველის წინაშე დავალებული იყო. დათა ახალაია მიხეილ სააკაშვილთან ვალში იყო, როგორც მორალურად, ასევე სამართლებრივად. დაცვის მხარის ადგილას შემრცხვებოდა საქართველოს ექსპრეზიდენტის, მიხეილ სააკაშვილის დაცვა. რა შუაშია ადვოკატის მიერ წარმოდგენილი მტკიცებულებები და პოლიტიკური განცხადებები ერთმანეთთან? მე არ მაინტერესებს პოლიტიკური განცხადებები, რომლითაც ადვოკატი კაკოიშვილი სავსეა. მაინტერესებს ერთი მტკიცებულება მაინც რატომ არ წარმოადგინეს, მოწმე დათა ახალაიას ჩვენებიდან. დიახაც, მე ამ საქმეზე გამამტყუნებელ განაჩენს ველოდები, რადგან დაცვას სათანადო მტკიცებულებები არ ჰქონდა წარმოდგენილი და მათი არგუმენტები არ იყო სამართლებრივი. დაცვის მხარე მხოლოდ ერთადერთი მოწმის, დათა ახალაიას ჩვენების საფუძველზე გამამართლებელ განაჩენს არ უდნა ელოდებოდეს“, - განაცხადა პროკურორმა.
თბილისის საქალაქო სასამართლოში საქართველოს ყოფილი პრეზიდენტის, მიხელ სააკაშვილის სისხლის სამართლის საქმეზე ბრალდების მხარემ დასკვნითი სიტყვის წარმოთქმა რამდენიმე წუთის წინ დაასრულა.
საქმეზე მომდევნო პროცესი 13 დეკემბერსაა ჩანიშნული. ამ დღეს დაცვის მხარე დასკვნით სიტყვას წარმოთქვამს. მიხეილ სააკაშვილს სამსახურეობრივი უფლებამოსილების ბოროტად გამოყენებას ედავებიან. რაც, როგორც პროკურორმა აღნიშნა, იმ უკანონო შეპირებას მოიცავს, რომელიც სააკაშვილის მიერ გირგვლიანის საქმის არგახსნის, მასში მონაწილე ორგანიზატორების და შემკვეთების არმხილების და მართლმსაჯულების არაღსრულების კუთხით განხორციელდა.