თუ სააკაშვილი დააკავეს, ეს იქნება ახალი პოლიტიკური რეალობის დაწყება როგორც საქართველოში, ისე უკრაინაში, - ამის შესახებ ენმ-ის წევრმა ხატია დეკანოიძემ ,,tv პირველის” ეთერში განაცხადა.
„თუ მაინც მოხდა სააკაშვილის ძალადობრივი დაკავება, იმ ქართველების მსგავსად, რომელიც ჩვენ ვიხილეთ, რაც არღვევდა ადამიანის უფლებათა კონვენციას და მისი გადმოცემა საქართველოში, ეს იქნება ახალი პოლიტიკური რეალობის დაწყება ჩვენი ქვეყნისთვის და ეს იქნება ნამდვილად დასასრული იმ ოლიგარქიული რეჟიმისა, რომელიც ჩვენს ქვეყანაშიც არის და უკრაინაშიც.
თუ გავითვალისწინებთ იმ მდგომარეობას, რომელიც დღეს არის უკრაინაში მე ვგულისხმობ ადამიანების დამოკიდებულებას ხელისუფლების მიმართ უნდობლობას, გამიჭირდებოდა, ვთქვა ის, რომ უკრაინის ხელისუფლებას ეყოფა გამბედაობა, დააკავოს მიხეილ სააკაშვილი. მაგრამ ჩვენ ასევე უნდა გავითვალისწინოთ, რომ უკრაინაში ხელისუფლება არ არის დემოკრატიული, ეს არის ხელისუფლება, რომელიც ოლიგარქიული თამაშის წესებით თამაშობს და სწორედ ამ თამაშის წესების გაგრძელება იყო უკრაინის პრეზიდენტის და ივანიშვილის მოლაპარაკება, რომელიც, სავარაუდოდ, კვირიკაშვილისა და გროისმანის მოლაპარაკებით გაგრძელდა, თუმცა ქართული მხარე უკრაინულ მხარეს დღემდე უმტკიცებდა, რომ არ სურთ მიხეილ სააკაშვილი იხილონ საქართველოს ტერიტორიაზე,"- განაცხადა ხატია დეკანოიძემ.
საქართველოს ყოფილმა პრეზიდენტმა კიევში გუშინ, საგანგებო ბრიფინგი გამართა და განაცხადა, რომ პეტრე პოროშენკომ მისი ციხეში ჩასმის ბრძანება ქვეყნის მთავარ პროკურორს მისცა.