ვაპირებ, პირველ რიგში სრულიად ევროპულ რელსებზე გადავიყვანო სახალხო დამცველის აპარატი, - ამის შესახებ "პატრიოტთა ალიანსის" ომბუდსმენობის კანდიდატმა გიორგი ფოფხაძემ პარლამენტის ადამიანის უფლებათა დაცვის კომიტეტის სხდომაზე განაცხადა.
მისი განმარტებით, ევროპულ რელსებზე გადაყვანა ნიშნავს, რომ საქართველოს ნებისმიერი მოქალაქის უფლებები, განურჩევლად პოლიტიკური შეხედულებისა, ეროვნებისა, სექსუალური მიმდინარეობისა, რელიგიური მრწამსისა, იყოს დაცული და არ იყოს დიფერენციაცია ადამიანებს შორის მათი რელიგიური, ან სექსუალური ნიშნით.
ფოფხაძემ მაგალითად საფრანგეთი მოიყვანა და აღნიშნა, რომ ქვეყანაში პრიორიტეტი კათოლიკურ რელიგიას აქვს. მისივე თქმით, საფრანგეთში სახელმწიფო და რელიგია ერთმანეთისგან გაყოფილია, რაც "ჩვენთან ასე არ არის".
"მინდა, ვთქვა, რომ ჩვენ ვართ ტრადიციების მიმდევარი ქვეყანა, ისევე, როგორც ის ქვეყანა, საიდანაც მე ახლა გერთვებით. აქ [საფრანგეთში] პრიორიტეტი აქვს კათოლიკურ რელიგიას. გვინდა, თუ არ გვინდა, საფრანგეთში გაყოფილია სახელმწიფო და რელიგია. ჩვენთან ეს ასე არ არის. ამიტომ, პირველ რიგში მივიჩნევ, რომ ჩვენ უნდა ვიყოთ, გვინდა არ გვინდა, ამ რელიგიის წარმომადგენლების, ასე ვთქვათ ისევე დამცველი, როგორც სხვა რელიგიის წარმომადგენლების", - აღნიშნა ფოფხაძემ.
