ხელშეკრულება, რომელზეც გადაწყვეტილება რუსეთის მთავრობამ მიიღო და უკავშირდება ე.წ. სამხრეთ ოსეთის შეიარაღებული ძალების რუსეთის შეიარაღებული ძალების შემადგენლობაში შესვლას, რუსეთის მხრიდან კიდევ ერთი არალეგალური ნაბიჯია, რომელიც ყველა საერთაშორისო ნორმას, პრინციპს და რუსეთის მიერ ნაკისრ ყველა საერთაშორისო ვალდებულებას ეწინააღმდეგება, - ამის შესახებ საქართველოს საგარეო საქმეთა მინისტრმა მიხეილ ჯანელიძემ განაცხადა.
მისი თქმით, ოკუპირებული სამხრეთ ოსეთის ე.წ. შეიარაღებული ძალების რუსეთის შემადგენლობაში გადასვლა რუსეთის მიერ საქართველოს ოკუპირებული რეგიონების ანექსიისკენ გადადგმული ნაბიჯია.
„ხელშეკრულება, რომელზეც გადაწყვეტილება რუსეთის მთავრობამ მიიღო და უკავშირდება ე.წ. სამხრეთ ოსეთის შეიარაღებული ძალების რუსეთის შეიარაღებული ძალების შემადგენლობაში შესვლას, რუსეთის მხრიდან კიდევ ერთი არალეგალური ნაბიჯია, რომელიც ყველა საერთაშორისო ნორმას, პრინციპს და რუსეთის მიერ ნაკისრ ყველა საერთაშორისო ვალდებულებას ეწინააღმდეგება. ეს ნაბიჯი ოკუპირებული რეგიონების მაქსიმალურ დაქვემდებარებას და კონტროლს ემსახურება. ეს ფაქტობრივი ანექსიისკენ გადადგმული ნაბიჯია. რა თქმა უნდა, მას ვერანაირი სამართლებრივი სტატუსი ვერ ექნება, მაგრამ ეს სამწუხაროდ, რუსული პოლიტიკის გაგრძელებაა. ჩვენ ამ ნაბიჯებს ვგმობთ და საერთაშორისო საზოგადოებას მოვუწოდებთ, ამ კონკრეტულ ნაბიჯს შესაბამისი შეფასება მისცეს. ჩვენ სამშვიდობო პოლიტიკის ფარგლებში კონფლიქტის მშვიდობიანად დარეგულირებისთვის ყველაფერს გავაკეთებთ“, – განაცხადა ჯანელიძემ.
