„ძალიან სამწუხაროა, რომ ვერ შევძელით იმ 9 მოსამართლის დარწმუნება, რომლებმაც მიიჩნიეს, რომ ვანო მერაბიშვილის საკნიდან გაყვანის ფაქტს ადგილი ჰქონდა“, - ამის შესახებ ლტოლვილთა და განსახლების მინისტრმა, სოზარ სუბარმა, სტრასბურგის სასამართლოს გადაწყვეტილების კომენტირებისას განაცხადა.
„რას ვიზამთ, სასამართლო გადაწყვეტილება არსებობს და ეს არანაირად არ ეხება მერაბიშვილის პატიმრობის კანონიერებას და მითუმეტეს გათავისუფლების რაიმე საფუძველს“, - განმარტა სუბარმა.
სტრასბურგის სასამართლომ ყოფილი პრემიერ-მინისტრის, მსჯავრდებულ ვანო მერაბიშვილის საქმეზე ძალაში დატოვა ევროკონვენციის მე-18 მუხლის დარღვევა. ადამიანის უფლებათა ევროპულმა სასამართლომ გამოიტანა გადაწყვეტილება საქმეზე, რომლის თანახმად მერაბიშვილი მთავარ პროკურორთან შესახვედრად და მასზე ზეწოლის მოსახდენად საპატიმროდან მალულად გამოიყვანეს. სასამართლომ საქართველოს ხელისუფლება მერაბიშვილის წინასწარ პატიმრობაში ყოფნის დროს ადამიანის უფლებათა ევროპული კონვენციის რიგი ნორმების დარღვევაში დაადანაშაულა, მათ შორის მე-18 მუხლის, რომელიც კრძალავს ადამიანის თავისუფლების შეზღუდვას სხვა მიზნებისთვის. ეს გადაწყვეტილება საქართველოს იუსტიციის სამინისტრომ ადამიანის უფლებათა ევროპული სასამართლოს დიდ პალატაში გასული წლის ოქტომბერში გაასაჩივრა.
ცნობისთვის, მერაბიშვილის საკნიდან გაყვანის დროს სასჯელაღსრულების მინისტრი სოზარ სუბარი იყო.
