იურისტმა ლევან ალაფიშვილმა, 112-ის მომსახურების საფასურის გაუქმების მოთხოვნით, საკონსტიტუციო სასამართლოში კონსტიტუციური სარჩელი შეიტანა.
როგორც მან „ჯი-ეიჩ-ენთან“ საუბრისას განმარტა, მოქალაქე საფასურის სანაცვლოდ არ იღებს მომსახურებას, რაც თავისთავად, კანონდარღვევაა, რადგან საფასურს ყოველთვის თან სდევს კონკრეტული მომსახურების ვალდებულება.
„გასაჩივრებული მაქვს ორი ნორმატიული აქტი, ერთი არის კანონის კონკრეტული ნორმა, რომლითაც შექმნილია 112 და განსაზღვრულია მთავრობის უფლებამოსილებად, რომ საფასურების დაწესება შეუძლია და მეორე, მთავრობის დადგენილების ორი მუხლი, რომლითაც საფასური ფიზიკური პირებისთვის 20 თეთრის, ხოლო იურიდიული პირებისთვის 50 თეთრის ოდენობით განისაზღვრა, ამ საფასურის ამოღება კი დაეკისრათ მობილურ ოპერატორებს. იმის გათვალისწინებით, რომ რიგითი მოქალაქე არავითარ მომსახურებას არ იღებს საფასურის სანაცვლოდ, ეს, თავისი შინაარსით, ძალიან მიემსგავსება გადასახადს, რადგან გადასახადი არის უპირობოდ შესასრულებელი ფინანსური ვალდებულება, საფასურს კი ყოველთვის თან სდევს კონკრეტული მომსახურება.
მაგალითად: საჯარო რეესტრში, ჩვენ ყოველგვარი მომსახურებისთვის - იქნება ეს რეგისტრაცია თუ სხვადასხვა რამ, ვიხდით საფასურს. ამ შემთხვევაში კი სახეზე არ გვაქვს მომსახურება, რაც არის კონსტიტუციის საწინააღმდეგო“, - ამბობს ალაფიშვილი.
როგორც იურისტი აღნიშნავს, მიუხედავად იმისა, რომ თვეში 20 თეთრი(ფიზიკური პირებისთვის) და 50 თეთრი(იურიდიული პირებისთვის)შესაძლოა, მოქალაქეებს არ ეჩვენებოდეთ დიდ თანხად და ამიტომაც, არ აპროტესტებდნენ აღნიშნულს, ამ მომსახურებით მიღებული შემოსავალი ბიუჯეტში, წლიურად, 7-7.5 მილიონ ლარს აღწევს.
„გასაჩივრებული მაქვს ორი მუხლით, ერთი - საკუთრების უფლების ხელყოფა და შეზღუდვა. მეორე - დისკრიმინაცია, რადგან ამ საფასურებშიც არის დადგენილი გარკვეული დაუსაბუთებელი განსხვავებები: ფიზიკური პირისთვის 20 და იურიდიული პირისთვის 50 თეთრი თვეში, ასევე, არის განსხვავებები ფიზიკურ პირებს შორსაც, ამიტომაც, ორივე აქტი ანტიკონსტიტუციურია და მაქვს წარმატების იმედი, რომ არ მჯეროდეს საკონსტიტუციო სასამართლოსი, არ მივმართავდი.
8-9 წელია საჯარო სამართლის იურიდიული პირების მომსახურების საფასურების ტარიფების დაუსაბუთებლობისა და სისტემური გაუმართაობის შესახებ ვსაუბრობ, მაგრამ სამწუხაროდ, საკითხი გადაუწყვეტელია, პრობლემა რჩება პრობლემად. როგორც ჩანს, ყველა მთავრობისთვის ძნელი აღმოჩნდა, შელეოდა იმ ცდუნებას, რომ მნიშვნელოვანი ფინანსური სარგებელი დაეთმო. ეს ერთ-ერთია სხვა ინსტიტუტებთან და დაწესებულებებთან ერთად, სადაც ანალოგიური პრობლემები არსებობს.
ამიტომაც, მოცდას ვამჯობინე მოქმედება. შესაბამისად, მივიღე გადაწყვეტილება და გავგზავნე კონსტიტუციური სარჩელი საკონსტიტუციო სასამართლოში“- განაცხადა ლევან ალაფიშვილმა.