"საქართველო ხელს უწყობს გლობალური პროექტების განვითარებას და სტრატეგიული მნიშვნელობის ინიციატივების განვითარებას", - ამის შესახებ საქართველოს საგარეო საქმეთა მინისტრმა, მიხეილ ჯანელიძემ თბილისის აბრეშუმის გზის ფორუმის მისასალმებელ პანელზე განაცხადა.
მინისტრის შეფასებით, წინა ფორუმთან შედარებით, წელს მონაწილეთა რაოდენობა და ინტერესი გაორმაგებულია.
"ეს არის დიდი წარმატება, რადგანაც წელს მონაწილე ქვეყნების რაოდენობა, წინა ფორუმთან შედარებით, გაორმაგებულია. ეს ხაზს უსვამს საქართველოს სავაჭრო ლოჯისტიკური ფუნქციის მატარებლის მზარდ როლს რეგიონში. საქართველო ხელს უწყობს გლობალური პროექტების განვითარებას და სტრატეგიული მნიშვნელობის ინიციატივების განვითარებას. საქართველო დღეს არის ლიდერი არა მხოლოდ ევროპული ტრანსფორმაციის მიმართულებით, რაც დადასტურდა აღმოსავლეთ პარტნიორობის სამიტზე, არამედ ასევე იმკვიდრებს ადგილს, როგორც ლიდერი რეგიონში თანამშრომლობის ახალი შესაძლებლობების აღმოჩენის კუთხით", - განაცხადა ჯანელიძემ.
მისივე შეფასებით, დღეს მსოფლიოს მასშტაბით, მათ შორის ევროპის და აზიის კონტინენტებზე, ძალიან ბევრი გამოწვევაა.
"ძალიან ბევრი გამოწვევაა დღეს, მსოფლიოს მასშტაბით, მათ შორის ევროპის და აზიის კონტინენტებზე. ჩვენი მიზანია, რომ მოვძებნოთ მეტი თანამშრომლობის მექანიზმი, რომელიც ხელს შეუწყობს მშვიდობას, სტაბილურობას, განვითარებას და საქართველო დაიმკვიდრებს თავის ადგილს როგორც მნიშვნელოვანი, სანდო პარტნიორი ამ თანამშრომლობაში. ძალიან მნიშვნელოვანია რომ უკრაინის და მოლდოვის პრემიერ-მინისტრები ესწრებიან ფორუმს. ეს კიდევ ერთხელ ხაზს უსვამს ჩვენს ერთიან მიდგომას ევროპული ინტეგრაციისადმი. ევროპული ინტეგრაცია გულისხმობს არა მხოლოდ პოლიტიკურ, არამედ ინფრასტრუქტურულ, ფიზიკურ ინტეგრაციას და მნიშვნელოვანია, რომ უკრაინა, მოლდოვა და საქართველო ამ შემთხვევაში საერთო მიდგომით ხელმძღვანელობენ. დღეს გვაქვს საშუალება, აღმოსავლეთ ევროპა, რომელსაც წარმოადგენს საქართველო, მოლდოვა და უკრაინა და მათი შესაძლებლობები გავაცნოთ როგორც აზიური ქვეყნების წარმომადგენლებს, თუ ევროპელ და მსოფლიოს მასშტაბით პარტნიორებს, რომლებიც დაინტერესებული არიან ინვესტირებით და თანამშრომლობის გაღრმავებით აღმოსავლეთ ევროპაში", - აღნიშნა მიხეილ ჯანელიძემ.
