რეალურად გამორიცხულია, რომ ამ ცვლილებების ერთ-ერთი მიზანი არ იყოს ხარჯების ოპტიმიზაცია, - ამის შესახებ მთავრობის სტრუქტურული ცვლილებების ფინანსურ ნაწილზე საუბრისას ფრაქცია "ქართული ოცნების" თავმჯდომარემ მამუკა მდინარაძემ განაცხადა. მისი თქმით, მთავრობასთან კითხვები საპარლამენტო უმრავლესობასაც აქვს.
"ეს კითხვები გვექნება, როცა კანონპროექტის განხილვა დაიწყება. პირველ ეტაპზე მთავრობის პასუხია, რომ ამ ეტაპზე ფინანსური ნაწილი ძნელად დათვლადია და როცა მოხდება ჩაშლა, ფინანსური ნაწილიც ამის შემდეგ დაზუსტდება. არასწორი ინტერპრეტაცია რომ არ გამოგვივიდეს - რეალურად გამორიცხულია, რომ ამ ცვლილებების ერთ-ერთი მიზანი არ იყოს ხარჯების ოპტიმიზაცია", - განაცხადა მამუკა მდინარაძემ.
ფრაქცია "ევროპული საქართველოს" წევრმა მამუკა აბესაძემ განაცხადა, რომ სამთავრობო ცვლილებების შესახებ კანონპროექტის განმარტებით ბარათში პირდაპირ არის მითითებული, რომ ბიუჯეტის ხარჯვითი ნაწილი არ იცვლება.
საქართველოს მთავრობაში დაგეგმილ სტრუქტურულ რეორგანიზაციასთან დაკავშირებული საკანონმდებლო პაკეტი პარლამენტის ბიუროს დღევანდელ სხდომაზე წარედგინება.
