შევეცდებით, გარემოს დაცვის სამინისტრო დამოუკიდებელი სტრუქტურა იყოს - განაცხადა საპარლამენტო ფრაქცია “მწვანეების“ თავმჯდომარე გია გაჩეჩილაძემ მთავრობაში განხორციელებულ საკადრო და სტრუქტურულ ცვლილებებთან დაკავშირებით. მისი თქმით, ცუდი მოდელი არ არის, გარემოს დაცვის სამინისტროს სოფლის მეურნეობის სამინისტრო შეურთდეს, მაგრამ სჯობს, გარემოს დაცვა, როგორც საქართველოსთვის სტრატეგიული მიმართულება ცალკე იყოს.
,,ეს ცუდი მოდელი არ არის, მაგრამ სჯობს, რომ გარემოს დაცვა, როგორც საქართველოსთვის სტრატეგიული მიმართულება და ამასთანავე, ევროკავშირის ასოცირების ხელშეკრულებიდან გამომდინარე, ცალკე დამოუკიდებელი და გაძლიერებული სტრუქტურა იყოს. საქართველოს პირობებში ძნელი სათქმელია, ეს მოდელი იქნება თუ არა წარმატებული, მაგრამ ამის იმედი გვაქვს. ყველაფერს მუშაობა უნდა. „მწვანეთა პარტია“ მზადაა, მუშაობაში ჩავერთოთ, თუმცა როცა პარლამენტში კანონპროექტი შემოვა, შევეცდებით, გარემოს დაცვის სამინისტრო დამოუკიდებელი სტრუქტურა იყოს“, – აცხადებს გაჩეჩილაძე.
როგორც უკვე ცნობილია, გარემოს დაცვის სამინისტრო სოფლის მეურნეობის სამინისტროს უერთდება, რომლის ხელმძღვანელი ლევან დავითაშვილი იქნება. ეკონომიკისა და მდგრადი განვითარების სამინისტროს უერთდება ენერგეტიკის სამინისტრო და გარემოს დაცვისა და ბუნებრივი რესურსების სამინისტროს ბუნებრივი რესურსების მართვის კომპონენტი. მინისტრის პოსტზე ინიშნება დიმიტრი ქუმსიშვილი, რომელიც ინარჩუნებს პირველი ვიცე-პრემიერის სტატუსს.
