„მოსამართლე ბესიკ ბუგიანიშვილმა, დეკანოზ გიორგი მამალაძის საქმის დახურული სხდომის მასალები სხვა სისხლის სამართლის მწარმოებელ გამომძიებელს გადასცა ყოველგვარი გასაიდუმლოებისა და დალუქვის გარეშე. პირველი დანაშაული მოსამართლე ბესიკ ბუგიანიშვილმა განახორიცელა“, - განუცხადა „ჯი-ეიჩ-ენს“ ირაკლი ფირცხალავას ადვოკატმა, დავით ცინცქილაძემ.
მისი განმარტებით, მოსამართლის შემდეგ, კანონი გამომძიებელმა და პროკურორმა დაარღვიეს.
„გამომძიებელმა კბილაშვილმა და პროკურორმა ფანჩულიძემ, ე.წ. ციანიდის საქმის დახურული სხდომის მასალები აიღეს და ჩემი დაცვის ქვეშ მყოფისთვის გადასაცემად ყოველგვარი დალუქვისა და გასაიდუმლოების გარეშე გადასცეს მე-9 პენიტენციურ დაწესებულებას. აღნიშნულ დაწესებულებაში ეს მასალები დაახლოებით, 6 თვის განმავლობაში იმყოფებოდა და უამრავი თანამშრომლის ხელში გაიარა.
შესაბამისად, მოსამართლე ბუგიანიშილის, გამომძიებელისა და პროკურორის მხრიდან სისხლის სამართლის დანაშაული იკვეთება. ვითხოვ, ეს პირები სისხლის სამართლის პასუხისგებაში მიეცნენ იმ მუხლით, რა მულხზეც პროკურატურამ გამოძიება დაიწყო ე.წ. ციანიდის საქმის დახურული სხდომის მასალების გამჟღავნების თაობაზე, სადაც მათ ეჭვი მხოლოდ ადვოკატებზე მიიტანეს“, - აცხადებს ცინცქილაძე.
ის განმარტავს, რომ აღნიშნულ ქმედებასთან ერთად, მოსამართლე ბესიკ ბუგიანიშვილმა იცრუა, როცა განაცხადა, რომ დახურული სხდომის მასალები მხოლოდ მხარეებს გადასცა.
„ მნიშვნელოვანია ერთი ფატქიც, რომ მოსამართლე ბესიკ ბუგიანიშვილმა, როცა მას უკვე დახურული სხდომის მასალები სხვა სისხლის სამართლის მწარმოებელ გამომძიებლისთვის გადაცემული ჰქონდა, სატელევიზიო ეთერით იცრუა, როცა თქვა, რომ თითქოს, მას დახურული სხდომის მასალები დაცვისა და ბრალდების მხარეების გარდა არავისთვის გადაუცია“, - აცხადებს ცინცქილაძე.
თავის მხრივ კი, პროკურორი აცხადებს, რომ სამართლებრივ ჩარჩოებში ჯდებოდა ის, რომ მეორე მხარეს საქმის მასალები გადაეცა, რასაც ფირცხალავას ადვოკატი არ ეთანხმება.
„ციანიდის საქმე იმიტომ იყო დახურული, რომ იქ ისეთი სახის ინფორმაციები გაჟღერდებოდა, რაც გარკვეულ ინსტისტუტებს და პროცესში მონაწილე პირებს ზიანს მიაყენებდა. შესაბამისად, დახურული სხდომის მასალები, თუნდაც, ირაკლი ფირცხალავას ჩვენება, რომელშიც ის ისეთ გარემოებებზეც საუბრობს, რომლის გამოც, აღნიშნული საქმე მოსამართლემ დახურა, არ შეიძლებოდა მომხდარიყო არაუფლებამოსილ პირებთან. მითუმეტეს, დალუქვის გარეშე. არაუფლებამოსილი პირები კი, კბილაშვილი, ფანჩულიძე და ასევე პენიტენციური დაწესებულების თანამშრომლები არიან“, - აცხადებს ადვოკატი.
