„თუ პროკურატურა სასამართლოს საქმაინობაში უკანონო ჩარევისგან თავს შეიკავებს, თუ უაკნონო კომუნიკაცია და იძულება არ მოხდება, გამამტყუნებელი განაჩენის დადგომა შეუძლებელია“, - განუცხადა „ჯი-ეიჩ-ენს“ ყოფილმა მაღალჩინოსანმა, გიორგი ონიანმა.
მას გამამართლებელი განაჩენის გამოტანის იმედი აქვს.
„მტკიცებულებებზე დაყრდნობით, ერთადერთი, გამამართლებელი განაჩენის გამოტანა შეიძლება. არა იმიტომ, რომ ჩემი სისხლის სამართლის საქმეა და ბრალდებული მე ვარ. საქმეში არანაირი მტკიცებულება და მტკიცებულებათა ერთობლიობა არ მოიპოვება, რომელიც გონივრულ ეჭვს მიღმა ჩემს ბრალეულობას დაადასტურებს.
გარდა ამისა, დაკითხულია, სახალხო დამცველი, რომელიც აცხადებს, რომ მასთან ბრალდების მთავარი მოწმე მივიდა და უთხრა, რომ გიორგი ონიანის წინააღმდეგ რა ჩვენებაც მისცა, არასწორი იყო და ეს ჩვენება პროკურატურის ზეწოლის შედეგად მისცა. აქედან გამომდინარე, ობიექტურ რეალობაში გამამტყუნებებელ განაჩენზე მსჯელობა, შეუძლებელია.
მოსამართლემ გამამტყუნებელი გადაწყვეტილება რომ გამოიტანოს, უნდა ჩაწეროს, რომ სახალხო დამცველმა, რომელიც ადამიანის უფლებების დაცვის კონსტიტუციური გარანტია, სასამართლო მოატყუა და შეცდომაში შეიყვანა. თუ სასამართლო ამაზე წამსვლელია, ეს მათი არჩევანია“, - განაცხადა ონიანმა.
მან დღეს სასამართლოში საბოლოო სიტყვა წარმოთქვა. მოსამართლე სათათბიროდ გავიდა. სავარაუდოდ, ის გადაწყვეტილებას მომდევნო კვირაში გამოიტანს.
შეგახსენებთ, რომ გიორგი ონიანი 2014 წელს დააკავეს და მას მთავარი საგამოძიებო უწყება უფლებამოსილების გადამეტებას, მტკიცებულებების ფალსიფიკაციას, განზრახ თავისუფლების უკანონოდ აღკვეთას და პოლიტიკური ნისშით დევნას ედავება.
ბრალის დამტკიცების შემთხვევაში მას 8 წლამდე თავისუფლების აღკვეთა ემუქრება.
