სამხედრო პოლიციის ყოფილი ხელმძღვანელის, უკრაინაში დაკავებულ მეგის ქარდავას საქართველოში ექსტრადირების საკითხს დაახლოებით 7 თვე დასჭირდება. ამის შესახებ „ჯი-ეიჩ-ენს“ ქარდავას ადვოკატმა, მალხაზ ველიჯანაშვილმა განუცხადა.
„კონვენციის მიხედვით პირდაპირაა განსაზღვრული, რომ 40 დღის განმავლობაში ჩვენმა ქვეყანამ მოთხოვნა უნდა წარადგინოს. ამის შემდეგ, ქარდავას პატიმრობის ვადას ან გაუგრძელებენ, ან გირაოთი შეუცვლიან. ამის შემდეგ განხილვები დაიწყება, გადმოსცენ თუ არა ის საქართველოს, რასაც დაახლოებით, 6-7 თვე დასჭირდება“, - აცხადებს ველიჯანაშვილი.
ადვოკატი აღნიშნავს, რომ მეგის ქარდავასთან დაკავშირებით მიხეილ სააკაშვილის მიერ გაკეთებული განცხადების შესახებ არაფერი იცის. განცხადებაში სააკაშვილი განმარტავს, რომ ის მეგის ქარდავას არასდროს შეხვედრია და მის შესახებ მხოლოდ პრესიდან იცის.
„არც ვიცი მიხეილ სააკაშვილმა რა თქვა და არც ის, ერთმანეთს იცნობდნენ თუ არა. თუ სააკაშილმა თქვა, რომ არ იცნობდა, ე.ი. არ იცნობდა. მეგის ქარდავა სამხარეოს უფროსის მოადგილე იყო. ასეთი საქართველოში ძალიან ბევრია, ამის ზემდგომი თანამდებობაც ძალიან ბევრია. ქარდავა ბოლოს გენისპექციის უფროსი იყო. რაც შეეხება პრეზიდენტის მიერ მის დაჯილდოვებას, პრეზიდენტს ასიათასობით ადამიანი ჰყავს დაჯილდოვებული, რომელსაც შეიძლება ფიზიკურად არც იცნობდეს“, - აცხადებს ველიჯანაშვილი.
ის ქარდავას პოლიტიკური ნიშნით დევნაზე ამახვილებს ყურადღებას.
„მეგის ქარდავას უკრაინაში დაკავება რატომ მოხდა არ ვიცი, მაგრამ საქართველოდან რომ პოლიტიკურად იდევნება, ამას ნამდვილად ვადასტურებ“, - განაცხადა ადვოკატმა.
შეგახსენებთ, რომ ქარდავას ბრალი ედება რამდენიმე სისხლის სამართლის საქმეში. მათ შორის, სამეგრელოში აღმოჩენილი საიდუმლო სამალავების საქმეზე 2014 წელს მას დაუსწრებლად 9 წლით თავისუფლების აღკვეთა მიესაჯა. ის არის ერთ-ერთი ფიგურანტი სერგო თეთრაძის წამების ორგანიზების საქმეში სასჯელაღრსრულების ყოფილ მინისტრ ბაჩო ახალაიასთან ერთად. მეგის ქარდავას გენერალ რომან დუმბაძის მკვლელობის საქმეზე ბრალი წაუყენეს 109-ე მუხლით, რაც განზრახ მკვლელობის მცდელობას ითვალისწინებს. გამოძიება მას დანაშაულის ორგანიზებას და მკვლელობის დაკვეთას ედავება; ასევე თავდაცვის სამინისტროს ბიუჯეტიდან თანხების მითვისების გამო, ქარდავას 2013 წელს დაუსწრებლად შეეფარდა პატიმრობა და მასზე გამოცხადდა ძებნა.