"სტრასბურგის ადამიანის უფლებათა ევროპულ სასამართლოში შეტანილი სარჩელი ვანო მერაბიშვილის წინასწარი პატიმრობის ეპიზოდს ეხება, ამჟამად კი ვანო მერაბიშვილი წინასწარ პატიმრობაში აღარ იმყოფება", - ამის შესახებ იუსტიციის მინისტრმა, თეა წულუკიანმა განაცხადა და განმარტა, რომ როგორიც უნდა იყოს სტრასბურგის სასამართლოს გადაწყვეტილება ვანო მერაბიშვილის საქმეზე, ეს ვერ იქნება მისი გათავისუფლების მიზეზი.
„ვანო მერაბიშვილის ვადაზე ადრე გათავისუფლების საკითხი არის განხილვის საკითხი და არის პროცედურები. სპეკულაციები არ შეიძლება. სასჯელაღსრულების სამინისტრომაც ნათელი განცხადება გაავრცელა. მე არ მგონია, რომ პოლიტიკოსებმა განცხადებები უნდა აკეთონ. სტრასბურგის სასამართლოს გადაწყვეტილების მოლოდინში ჩვენც ვართ, თუმცა როგორიც არ უნდა იყოს გადაწყვეტილება, ეს ვერ იქნება გათავისუფლების მიზეზი. სტრასბურგში საქმე ეხება წინასწარი პატიმრობის ეპიზოდს და ვანო მერაბიშვილი ამჟამად აღარ არის წინასწარ პატიმრობაში“, - აღნიშნა თეა წულუკიანმა შინაგან საქმეთა ყოფილი მინისტრის, ვანო მერაბიშვილის საკითხზე საუბრისას.
შეგახსენებთ, გუშინ გავრცელდა ინფორმაცია, რომ ვანო მერაბიშვილი შესაძლოა, ვადაზე ადრე გათავისუფლდეს.
მოგვიანებით, აღნიშნულს გამოეხმაურა სასჯელაღსრულებისა და პრობაციის სამინისტრო.
უწყების განცხადებაში ნათქვამია, რომ მსჯავრდებულ ივანე მერაბიშვილს, დღეის მდგომარეობით, არ აქვს მოხდილი სასჯელის მოხდისგან პირობით ვადამდე გათავისუფლებისათვის კანონით განსაზღვრული ვადა, შესაბამისად, უწყების ცნობით, მერაბიშვილის საქმეს სასჯელაღსრულებისა და პრობაციის სამინისტროს ადგილობრივი საბჭო მოცემულ ეტაპზე ვერ განიხილავს.