მამაჩემიც რომ გაცოცხლდეს, მე ვეღარ დავთმობ ვერანაირ თანამდებობას, - ამის შესახებ თიანეთის მერობის კანდიდატმა თამაზ მეჭიაურმა გადაცემა "არჩევანში" განაცხადა.
მისი თქმით, რაიონში ყველა გადაწყვეტილებას, ლელა ქიტესაშვილის ნაცვლად, ზაქარია ქუცნაშვილი იღებდა. მისივე თქმით, დღეს გამართულ სასამართლოზე დადასტურდა, რომ თიანეთის მე-20 უბანზე არ ყოფილა არცერთი ბიულეტინი, სადაც ქიტესაშვილი იყო შემოხაზული.
„დღეს სასამართლოზე კომისიის რამდენიმე წევრმა დაადასტურა, რომ იქ ლელა ქიტესაშვილის არანაირი ბიულეტინი არ ყოფილა და ისე დაილუქა ეს კონვერტი“, - განაცხადა მეჭიაურმა.
მეჭიაურის განცხადებით, არჩევნების დღეს, ხმების დათვლის დროს მის წარმომადგენელს უბანზე მისულს მობილიზებული სამართალდამცავები დახვდნენ და შემდეგ ამ წარმომადგენლებს შენობაში შესვლის საშუალებას არ აძლევდნენ.
მისივე თქმით, ქუცნაშვილს თიანეთში პოლიტიკური და ბიზნესინტერესი აქვს, რის გამოც არ აწყობს მისი მერად გახდომა.
„მე, ნამდვილად, დიდი პატივს ვცემდი და ახლაც პატივს ვცემ ბატონ ბიძინას და მისი თხოვნა გავითვალისწინე ორჯერ, თუმცა, ახლა ნამდვილად ვეღარ გავითვალისწინებ ზაქარიას სასარგებლოდ. მამაჩემიც რომ გაცოცხლდეს, მე ვეღარ დავთმობ ვერანაირ თანამდებობას“, - აღნიშნავს მეჭიაური, რომელიც აქვე აცხადებს, რომ ივანიშვილმა მას დეპუტატობის კანდიდატობაზე უარის თქმა სთხოვა, რაზეც დასთანხმდა. ის "ქართულ ოცნებას" "მოქალაქეთა კავშირს" ამსგავსებს.
