უმუშევარი, გალოთებული სახლში იჯდა დღე და ღამე სვამდა და არაფერს არ აკეთებდა. მე მას შანსი მივეცი, - ასე გამოეხმაურა გადაცემა "არჩევანში" "ქართული ოცნების" წევრი, დეპუტატი ზაქარია ქუცნაშვილი თიანეთის მერობის კანდიდატის, თამაზ მეჭიაურის განცხადებას, რომ ქუცნაშვილმა არჩევნები გააყალბა და მისი ხმები მიიტაცა.
ზაქარია ქუცნაშვილის განცხადებით, მაშინ, როდესაც ბიძინა ივანიშვილი გამოჩნდა, თამაზ მეჭიაური წარმოადგენდა მისთვის უკვე მეექვსე პარტიას და მან არაერთხელ სთხოვა, რომ "ქართულ ოცნებაში" მიეყვანა. მისი თქმით, იქიდან გამომდინარე, რომ მისი და მეჭიაურის წინაპრები იყვნენ და-ძმანი და მთის წესის მიხედვით, მან უარი ვერ უთხრა და მიიყვანა.
„თამაზი ჩემს მზეს ლოცულობდა, დღე და ღამე ჩემს სადღეგრძელოს სვამდა და შტაბის უფროსად გავამწესეთ ჩემს მშობლიურ თიანეთის რაიონში“, - განაცხადა ზაქარია ქუცნაშვილმა.
მისივე თქმით, თამაზ მეჭიაურზე უარყოფითი ინფორმაცია არსებობდა და მას ძალიან კორუმპირებული ჩინოვნიკის სახელი ჰქონდა. მისივე თქმით, თამაზ მეჭიაური "ქართულ ოცნებას" აშანტაჟებდა.
„დააყენა თავისი კანდიდატურა თიანეთის რაიონში, მაშინ არ იყო ციხის კადრები ჯერ გამოსული და თქვა, რომ მე თუ სიაში არ ჩამწერთ, მე ვიმუშავებ იქით, სადაც გამიხარდება“, - განაცხადა ზაქარია ქუცნაშვილმა.