დღეს პროკურატურაში ე.წ. ციანიდის საქმის კიდევ ორი ადვოკატი, პაატა მეხრიშვილი და სულხან კომახიძე დაიბარეს.
როგორც "ჯი-ეიჩ-ენ"-თან პაატა მეხრიშვილი აღნიშნავს, ის ჩვენების მიცემას არ აპირებს.
"ჩვენებას არ მივცემ, ვისარგებლებ საპროცესო კანონმდებლობით მონიჭებული უფლებებით და შევასრულებ იმ ვალდებულებას, რაშიც მე კანონი და ადვოკატთა პროფესიული ეთიკის კოდექსი, როგორც ადვოკატს, მანიჭებს. გუშინ დამირეკა გამომძებელმა და შემატყობინა, რომ დღეს პროკურატურაში უნდა მივსულიყავი იმ გამოძიების გამო, რომელიც დაწყებულია 374-ე მუხლთან დაკავშირებით. პროკურატურაში დაბარებული ვარ მოწმის სახით დაკითხვაზე. თუ რა ინტერესებთ და რა კითხვები ექნებათ ჩემთან, ეს რა თქმა უნდა, წინასწარ არ ვიცი, თუმცა ერთი რამ ზუსტად ვიცი, რაც მე ამ საქმესთან დაკავშირებით ინფორმაცია მაქვს, მაქვს როგორც ადვოკატის პროფესიული მოვალეობის შესრულებასთან დაკავშირებით. საპროცესო კანონმდებლობით მაქვს მონიჭებული უფლება, არათუ ჩვენება არ მივცე, არამედ კონფიდენციალურად შევინახო ნებისმიერი ინფორმაცია, რომელიც ჩემი დასაცავი პირის საქმესთან დაკავშირებით ჩემთვის ცნობილი გახდა. შესაბამისად, ჩემგან რა მოლოდინი უნდა ჰქონდეთ, არ ვიცი. არანაირი ინფორმაცია არ მაქვს, მაგრამ რომ მქონდეს მათ ვერ მივაწვდი", - განაცხადა პაატა მეხრიშვილმა.
ცნობისთვის, მეხრიშვილი პროკურატურაში 2 საათზეა დაბარებული.
