პრეზიდენტმა ხელიდან გაუშვა უკანასკნელი შანსი, პოზიტიური წვლილი შეეტანა საკონსტიტუციო რეფორმის პროცესში, - ამის შესახებ ფრაქცია "ქართული ოცნება - დემოკრატიული საქართველოს" თავმჯდომარე მამუკა მდინარაძემ განაცხადა. მისივე თქმით, ორი საკითხის დამატებით პრეზიდენტმა უზრუნველყო ის, რომ უმრავლესობა ვეტოს გადავლახავს.
"მოტივირებული შენიშვნები შეეხება ექვს საკითხს, აქედან ოთხთან დაკავშირებით ისედაც არსებობს შეთანხმება ვენეციის კომისიასთან. მეხუთე შეეხება ჩვენი ოპოზიციონერების პოლიტიკურ ბედს - რამდენი დეპუტატით მეტს გაიყვანენ პარლამენტში, მეექვსე კი არის იურიდიული აბსურდი. აქედან გამომდინარე, ამ ორი საკითხის დამატებით პრეზიდენტმა უზრუნველყო ის, რომ ჩვენ ვეტოს გადავლახავთ. მან ხელიდან გაუშვა უკანასკნელი შანსი, პოზიტიური წვლილი შეეტანა ამ პროცესში", - განაცხადა მდინარაძემ.
მმართველი უმრავლესობა საკონსტიტუციო ცვლილებებზე პრეზიდენტის მიერ წარდგენილ მოტივირებულ შენიშვნებთან დაკავშირებით პარლამენტის რიგგარეშე სხდომის გამართვას 13 ოქტომბრისთვის გეგმავს.
