საქართველოსა და ნორვეგიის სამეფოს შორის დიპლომატიური ურთიერთობების დამყარების 25 წლის იუბილესთან დაკავშირებით საქართველოსა და ნორვეგიის საგარეო უწყებებმა მისალოცი წერილები გაცვალეს.
კოლეგისადმი მიწერილ წერილში, საქართველოს საგარეო საქმეთა მინისტრმა მიხეილ ჯანელიძემ ნორვეგიის პირველ დიპლომატს, ბიორგე ბრენდეს, საიუბილეო თარიღი მიულოცა და საქართველოსა და ნორვეგიას შორის არსებულ ისტორიული კავშირები და დღეს არსებული წარმატებული ორმხრივი ურთიერთობები დადებითად შეაფასა.
"მსურს ხაზი გავუსვა, რომ ნორვეგიის სამეფომ სკანდინავიური ქვეყნებიდან პირველმა აღიარა საქართველოს დამოუკიდებლობა. მას შემდეგ, ჩვენს ქვეყნებს შორის არსებული კავშირები ფართო და ნაყოფიერ ურთიერთობაში გადაიზარდა. მზარდი მეგობრული ურთიერთობები ეფუძნება საერთო ფასეულობებს და მსოფლიოში მშვიდობისა და კეთილდღეობის დამყარებისათვის პასუხისმგებლობის გაზიარებას", - ნათქვამია მიხეილ ჯანელიძის წერილში.
მიხეილ ჯანელიძე დადებითად აფასებს ბოლო რამდენიმე წლის განმავლობაში განსაკუთრებით გააქტიურებულ წარმატებულ ორმხრივ ურთიერთობებს, რომელიც პოლიტიკური დიალოგის, ეკონომიკის, განათლების, კულტურის, ენერგეტიკის და სხვა სფეროების ფართო სპექტრს მოიცავს.
თავის მხრივ საგარეო საქმეთა სამინისტროს მიერ, ნორვეგიის მთავრობის სახელით, გამოგზავნილ წერილში აღნიშნულია საქართველოსა და ნორვეგიას შორის სასამართლოს რეფორმის, განათლების, ადგილობრივი თვითმმართველობის, სამოქალაქო საზოგადოების განვითარების, კულტურული მემკვიდრეობის და თავდაცვის სფეროებში არსებული თანამშრომლობის პოზიტიური დინამიკა და აღნიშნულია, რომ ნორვეგიის მთავრობა გამოთქვამს მზადყოფნას ორმხრივი ურთიერთობების კიდევ უფრო გაღრმავებისთვის.
„ნორვეგია და საქართველო, როგორც გაერთიანებული ერების ორგანიზაციის, ევროპის საბჭოს და ეუთო-ს წევრი ქვეყნები იცავენ საერთო ფუნდამენტურ ღირებულებებს და პრინციპებს. ნორვეგია გამოთქვამს მზადყოფნას ითანამშრომლოს საქართველოსთან ნორვეგიელი და ქართველი ხალხის საკეთილდღეოდ და აღნიშნული ფასეულობებისა და მიზნების მისაღწევად".
წერილის დასასრულს მიხეილ ჯანელიძე მადლიერებას გამოთქვამს ნორვეგიის სამეფოს მიერ საქართველოს ევროპული და ევროატლანტიკური ინტეგრაციის პროცესისა და ქვეყნის სუვერენიტეტისა და ტერიტორიული მთლიანობის მტკიცე მხარდაჭერისთვის და ნორვეგიას საქართველოს მხრიდან მშვიდობის, სტაბილურობის და განვითარების უზრუნველყოფის კუთხით თანადგომას და პარტნიორობას აღუთქვამს.
