პარლამენტის თავმჯდომარე ირაკლი კობახიძე პარტიების ფინანსური აუდიტის კომპეტენციის ცენტრალური საარჩევნო კომისიისთვის გადაცემას არ გამორიცხავს. ამის შესახებ მან ჟურნალისტებს განუცხადა.
მისი განცხადებით, იმისათვის, რომ პარტიების სრული ფინანსური კონტროლი ზედმიწევნით განხორციელდეს, საჭიროა, გარკვეული რეპრესიული მექანიზმების ამოქმედება, რაც 2012 წლის პრაქტიკიდან ცუდად გვახსოვს.
„შეიძლება, სხვა ალტერნატიულ გადაწყვეტილებაზე ვიფიქროთ. ეს შეიძლება პარლამენტი იყოს, რაც ჩემი აზრით, მიზანშეწონილი არ არის. ასევე ეს შეიძლება ცენტრალური საარჩევნო კომისია იყოს. სადღეისოდ პარტიების ფინანსური კონტროლი ეფექტურად არ ხორციელდება, რასაც თავისი ობიექტური მიზეზები აქვს. გასული წლის საპარლამენტო არჩევნებისას რა თანხებიც დაიხარჯა, იმის მხოლოდ 20% იყო დეკლარირებული. იმისათვის, რომ პარტიების სრული ფინანსური კონტროლი ზედმიწევნით განხორციელდეს, საჭიროა, გარკვეული რეპრესიული მექანიზმების ამოქმედება, რაც 2012 წლის პრაქტიკიდან ცუდად გვახსოვს - ამას თავისი ძალიან დიდი მინუსები აქვს“, - განაცხადა კობახიძემ.
ცნობისთვის, საფინანსო-საბიუჯეტო კომიტეტზე, საკონსტიტუციო ცვლილებების განხილვისას, დეპუტატების მხრიდან მოსაზრება გამოითქვა, რომ მიზანშეწონილი არ არის, პარტიების ფინანსური კონტროლის კომპეტენცია აუდიტის სამსახურს ჰქონდეს მინიჭებული.
