მთავრობა ახალ საგამოძიებო ორგანოს პროკურატურაში ქმნის. იუსტიციის მინისტრის მოადგილის, სანდრო ბარამიძის განცხადებით, ახალი დეპარტამენტი მთავარ პროკურატურაში გამოიძიებს ისეთ საქმეებს, რომლებიც წამებას, არასათანადო მოპყრობას და ხელისუფლების ბოროტად გამოყენებას უკავშირდება. "ამ დეპარტამენტს ექნება მეტი დამოუკიდებლობა, ვიდრე სხვა რომელიმე დეპარტამენტს პროკურატურაში. კონცენტრაცია მოხდება წამების და არასათანადო მოპყრობის იმ ფაქტებზე, რომლებიც, სავარაუდოდ, ჩადენილია სამართალდამცავი ორგანოების წარმომადგენელთა მიერ. იქ არის ხელისუფლების ბოროტად გამოყენების მუხლებიც,"- განაცხადა ბარამიძემ.
მისივე თქმით, ორი წლის პროკურატურის კანონში მნიშვნელოვანი ცვლილებები შევიდა, რომელიც ამ უწყების დამოუკიდებლობის ხარისხს განსაზღვრავს. შეიქმნა საპროკურორო საბჭო, ახალი კონსტიტუციის პირობებში კი დაგეგმილია დამოუკიდებლობის კიდევ უფრო გაზრდა. "ნავარაუდევია, რომ პროკურატურა გავა აღმასრულებელი სისტემიდან", - განაცხადა სანდრო ბარამიძემ.
დოკუმენტი, რომელიც იუსტიციის სამინისტრომ მოამზადა უკვე გადაეგზავნა წამების წინააღმდეგ ბრძოლის საბჭოს. სანდრო ბარამიძის თქმით, დისკუსია ამ თემაზე გახსნილია და შესაძლოა გარკვეული კორექტივები კიდევ შევიდეს.
