საქართველოს პრეზიდენტის პრესსპიკერმა ეკა მიშველაძემ დღეს შეხვედრაზე აფგან მუხტარლის საქმეზე პრეზიდენტის პოზიცია გაახმოვანა.
"ამ სამწუხარო ფაქტმა საქართველოს საერთაშორისო იმიჯი მნიშვნელოვნად დააზიანა," - ასე გამოეხმაურა პრეზიდენტის პრესსპიკერი აზერბაიჯანელი ჟურნალისტის საქმეს. " ქართველი ხალხის მონაპოვარია, რომ საქართველო არ არის ქვეყანა სადაც ჟურნალისტებს დევნიან და ადამიანებს იტაცებენ. დღეს ყველანი - ხელისუფლებაც და საზოგადოებაც ვიმყოფებით შელახული იმიჯის დაძლევის კრიზისულ ეტაპზე", - აცხადებს ეკა მიშველაძე.
მისივე თქმით, რაც უფრო დიდხანს გაგრძელდება ეს პროცესი, რაც უფრო ხშირად გაკეთდება არაადექვატური კომენტარები ეს უფრო გაართულებს არსებულ სიტუაციას. "ყოველი დღე ზიანს აყენებს ჩვენი ქვეყნის რეპუტაციას", - აცხადებს გიორგი მარგველაშვილის პრესსპიკერი.
აფგან მუხტარლის ოჯახის წევრების თქმით, ის თბილისიდან 29 მაისს გაუჩინარდა, სახლიდან გავიდა და არ დაბრუნებულა. მოგვიანებით, ცნობილი გახდა, რომ ის ბაქოში გადაიყვანეს. ბაქოს საქალაქო სასამართლომ მას სამთვიანი წინასწარი პატიმრობა შეუფარდა. ჟურნალისტს აზერბაიჯანის პროკურატურამ ბრალი კონტრაბანდის, სახელმწიფო საზღვრის უკანონო გადაკვეთისა და პოლიციისთვის დაუმორჩილებლობის მუხლებით წარუდგინა.
აფგან მუხტარლის საქმესთან დაკავშირებით, საქართველოს შსს-მ გამოძიება დაიწყო საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს. სახელმწიფო უსაფრთხოების სამსახურის ხელმძღვანელის, ვახტანგ გომელაურის განცხადებით, აზერბაიჯანელი ჟურნალისტი „მწვანე საზღვარზე“ დააკავეს და არა გამშვებ პუნქტზე.
