პრეზიდენტის ადმინისტრაციის უფროსის, გიორგი აბაშიშვილის განცხადებით, პარლამენტის თავმჯდომარემ საკონსტიტუციო კომისიის შექმნიდან 6 თვის შემდეგ კიდევ ერთხელ დაადასტურა, რომ საკონსტიტუციო კომისიის საქმიანობის სულისკვეთება რეალურად იყო ანგარიშსწორება ერთ კონკრეტულ პოლიტიკოსზე - პრეზიდენტ მარგველაშვილზე.
,,რაც შეეხება პარლამენტის თავმჯდომარის მხრიდან ნახსენებ სიტყვა „კომპრომისს“, ეს არის არასწორი სიტყვა, ვინაიდან კომპრომისი არავის უთხოვია. ქართველ ხალხს სურს, აირჩიოს პრეზიდენტი პირდაპირი წესით და მათი ეს სურვილი არ შეეხება კონკრეტულად 2018 წელს მარგველაშვილის არჩევას. ქართველ ხალხს სურს პრეზიდენტის არჩევა პირდაპირი წესით 2018 წელს, 2023 წელს და ყოველ შემდგომ წლებში. შესაბამისად, ჩვენ არც ერთ შემთხვევაში არ ვაპირებთ ქართველი ხალხის ნებით და ამ უფლებით ვაჭრობას",- დასძინა აბაშიშვილმა.
ამასთან, პრეზიდენტის ადმინისტრაცია მიესალმება საქართველოს პარლამენტის თავმჯდომარის განცხადებას იმის შესახებ, რომ კონსტიტუციის პროექტის განხილვა პირველი მოსმენით ვენეციის კომისიის რეკომენდაციებამდე არ დაიწყება.
პარლამენტის თავმჯდომარემ დღეს განმაცხადა, რომ პრეზიდენტის გარკვეული დესტრუქციული გეგმები კონსტიტუციის რეფორმის წინააღმდეგ შედგა. „გარკვეული დესტრუქციული გეგმები შედგა და დაიწყო მათი განხორციელება. რეალურად ეს დაიგეგმა და განხორციელდა სამწუხაროდ პრეზიდენტის და მისი ადმინისტრაციის უშუალო ჩართულობით, რაც არის ძალიან შემაშფოთებელი, მითუმეტეს იმ პირობებში, როდესაც პრეზიდენტს ამ სისტემაში აკისრია ძალიან მნიშვნელოვანი ფუნქცია და ძალიან სამწუხაროა, რომ პრეზიდენტი ასეთ პირობებში გეგმავს დესტრუქციულ ქმედებებს საკონსტიტუციო რეფორმის წინააღმდეგ. ეს გეგმა სამწუხაროდ არა წარმატებულად, მაგრამ მაინც შედგა. ასეთ შემთხვევაში ლოგიკურია შეკითხვა, კომპრომისს რამდენად აქვს აზრი“,- აღნიშნა ირაკლი კობახიძემ.