სახელმწიფო დეპარტამენტის ძირითადი აქცენტია, რომ მოუწოდებს აზერბაიჯანს, გაათავისუფლონ დაკავებულები, - ამის შესახებ საქართველოს განათლებისა და მეცნიერეის მინისტრმა, ვიცეპრემიერმა ალექსანდრე ჯეჯელავამ აფგან მუხთარლის საქმეზე აშშ-ის სახელმწიფო დეპარტამენტის მიერ გაკეთებული განცხადების შეფასებისას განაცხადა.
„ჩვენ ძალიან დიდ მნიშვნელობას ვანიჭებთ ამ გამოძიებას. ე.ი. სად იყო ეს ადამიანი, სად აღმოჩნდა და როგორ აღმოჩნდა, ეს არის გამოძიების ძირითადი ამოცანა. ჩართული არიან ამერიკელი და ევროპელი მეგობრებიც ჩვენები და სახელმწიფო დეპარტამენტის ძირითადი აქცენტი, მოუწოდებს აზერბაიჯანს, ასე ვთქვათ, რომ გაათავისუფლონ დაკავებულები და მეორე კომპონენტია, ის რომ, დროულად იქნეს გამოძიება ჩატარებული,“ - განაცხადა ალექსანდრე ჯეჯელავამ.
აშშ-ის სახელმწიფო დეპარტამენტი განცხადებას ავრცელებს აზერბაიჯანელი ჟურნალისტის, აფგან მუხთარლის თბილისიდან გაუჩინარებისა და ბაქოში დაპატიმრების საქმეზე. “აშშ შეშფოთებულია, 30 მაისს, თბილისიდან აზერბაიჯანელი ჟურნალისტის, აფგან მუხთარლის გატაცების გამო. ასევე, შეწუხებულები ვართ, 25 მაისს, აზერბაიჯანის სახალხო ფრონტის თავმჯდომარის მოადგილის, გოზალ ბაირამლის დაპატიმრების გამო,” – ნათქვამია განცხადებაში. აშშ–ს სახელმწიფო დეპარტამენტი მიმართავს აზერბაიჯანის მთავრობას, რომ გაათავისუფლონ აღნიშნული პირები პატიმრობიდან. “ყურადღებით ვაკვირდებით საქართველოს გამოძიებას გატაცების საქმეზე და მოვუწოდებთ, რომ ეს გამოძიება იყოს სრულყოფილი, გამჭვირვალე და დროული,” – ნათქვამია განცხადებაში.
