შესაძლებელია, ეს ადამიანი „ა“ პუნქტიდან წასულიყო და ჩასულიყო „ბ“ პუნქტში, ამას რატომღაც არავინ უშვებს, - ამის შესახებ ვიცე-პრემიერმა, განათლებისა და მეცნიერების მინისტრმა ალექსანდრე ჯეჯელავამ აზერბაიჯანელი ჟურნალისტის საქმის შეფასებისას განაცხადა.
მისი თქმით, მისთვის მთავარი სინანული არის ის, რომ ფაქტად არის მიღებული დაშვება იმისა, რომ ეს ადამიანი გაუჩინარდა თბილისის ცენტრში.
"ოპოზიციის საქმე ალბათ ეს არის, რომ ამ პროცესის რადიკალიზაცია მოახდინოს. ჩვენ ვმუშაობთ საერთაშორისო პარტნიორებთან. თქვენ ნახეთ გერმანიის და სხვა ელჩების განცხადება, რომ ისინი ელოდებიან გამოძიების პროცესს. შესაბამისად, გამოძიების პროცესის მიმართ ჩემი ნდობა ძალიან მაღალია და დარწმუნებული ვარ, იმ ბრალდებებს, რაც გამოითქვა აზერბაიჯანელი ჟურნალისტის მეუღლისა და ადვოკატის მხრიდან და რაც აიტაცა ოპოზიციამ, პასუხი გაეცემა გამოძიების დასრულების შემდეგ. რაც შეეხება იმას, მე რა კითხვები მიჩნდება, რა თქმა უნდა, მიჩნდება კითხვები პირველ რიგში იმაზე, როდესაც საქმე ეროვნული უსაფრთხოების საკითხებს ეხება, რატომ ცდილობს ოპოზიცია ამ თემის ქვეყნის ინტერესების საწინააღმდეგოდ გამწვავებას და გამოდის უსაფუძვლო ბრალდებით. მთავარი შეკითხვა და მთავარი სინანული ჩემთვის არის ეს, რომ ფაქტად არის მიღებული დაშვება იმისა, რომ ეს ადამიანი გაუჩინარდა თბილისის ცენტრში. შესაძლებელია, ეს ადამიანი ა პუნქტიდან წასულიყო და ჩასულიყო ბე პუნქტში, ამას რატომღაც არავინ უშვებს. თუ უკანონოდ აპირებდა საზღვრის გადაკვეთას, ამას აუცილებლად პასპორტის გარეშე გააკეთებდა, დარწმუნებული ვარ", - განაცხადა ჯეჯელავამ.
