გაერო-ს გენერალური ასამბლეის რეზოლუცია არის მკაფიო გამოხატულება, თუ რამდენად აქტიურად დგას საქართველოს პრობლემატიკა საერთაშორისო საზოგადოების დღის წესრიგში, გაერო-ს ფარგლებში და რამდენად მზარდია საქართველოსადმი მხარდაჭერა, - ამის შესახებ საქართველოს საგარეო საქმეთა მინისტრმა მიხეილ ჯანელიძემ გაერო-ს გენერალური ასამბლეის მიერ დევნილების შესახებ საქართველოს მიერ ინიცირებული რეზოლუციაზე საუბრისას განაცხადა.
მინისტრმა მისიას ნიუ-იორკში და დიპლომატიურ კორპუსს მადლობა გადაუხადა.
”ეს არის საერთაშორისო საზოგადოების მკაფიო მხარდაჭერა საქართველოში არსებული პრობლემატკისადმი, საერთაშორისო სამართლის და საერთაშორისო ნორმებისადმი. ეს არის ძალიან დიდი წარმატება ქართული დიპლომატიის. მე მინდა მადლობა გადავუხადო, როგორც ჩვენს მისიას ნიუ - იორკში, ასევე ჩვენს დიპლომატიურ კორპუსს, რომლებმაც დიდი როლი ითამაშეს ამ შედეგის მიღწევაში”, - განაცხადა მიხეილ ჯანელიძემ.
ცნობისთვის, გაერო-ს გენერალური ასამბლეის 71-ე სესიამ კიდევ ერთხელ მიიღო საქართველოს მიერ ინიცირებული რეზოლუცია „აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ".
რეზოლუციას 80-მა ქვეყანამ დაუჭირა მხარი, 14-მა წინააღმდეგ მისცა ხმა, 61-მა კი თავი შეიკავა. აღსანიშნავია, რომ წინა წელთან შედარებით რეზოლუციის მხარდამჭერთა რიცხვი გაზრდილია. გასულ წელს რეზოლუციას 76-მა ქვეყანამ დაუჭირა მხარი, 15 წინააღმდეგი იყო, ხოლო 64-მა სახელმწიფომ თავი შეიკავა.
