„მნიშვნელოვანია, საზოგადოებას ავუხნათ, რომ სახელწოდების ცვლილება, კონტროლის პალატიდან აუდიტის სამსახურის მიმართულებით, მხოლოდ სახელწოდების ცვლილება არ იყო, არამედ ეს მთლიანად სისტემის და ჩვენი საქმიანობის ცვლილებაა. ეს საქმიანობა კონკრეტულ, ლოკალურ შემთხვევამდე და ინდივიდამდე დაყვანილი არ უნდა იყოს“- განაცხადა გენერალურმა აუდიტორმა ლაშა თორდიამ პრეზიდენთან შეხვედრაზე.
მისივე თქმით, სახელმწიფო აუდიტის სამსახური ცდილობდა არსებული სტერეოტიპის შეცვლას, რომ აუდიტის სამსახური არ არის ჩასაფრებული ორგანიზაცია, რომელიც ცალკეულ უწყებებში კანონდამრღვევების აღმოჩენას ცდილობს, არამედ ყველა იმ ორგანიზაციის პარტნიორია, რომელსაც ამოწმებს.
„სადარდებელია ის, რომ საზოგადოებაში არ შეიქმნას განცდა და ჩვენ არ დავუბრუნდეთ იმ სისტემის აღქმას, რომელიც კონტროლის პალატის მისამართით იყო. ჩვენი მიზანი იყო, რომ მასშტაბი, რომელიც სისტემურ ხარვეზებზე და საჯარო ფინანსების მართვის გაუმჯობესებას გულისხმობს, უფრო ნათლად აგვეხსნა საზოგადოებისთვის“, - აღნიშნა თორდიამ.
მისივე თქმით, ფარცხალაძესთან დაკავშირებულმა პრეცენდენტმა, რომელიც ცოტა ხნის წინ მოხდა, არ უნდა შექმნას საზოგადოებაში განცდა, რომ აუდიტის სამსახური ისევ კონტროლის პალატის სისტემას უბრუნდება, რომელიც ერთ კონკრეტულ ადამიანზეა ორიენტირებული.
„ოთარ ფარცხალაძე იქნება, თუ სხვა რომელიმე ადამიანი, ჩვენი პრიორიტეტი ინდივიდებზე ორიენტირება არ არის. შემოწმების სტილიც და პოლიტიკაც არის ის, რომ მერიაში, თუ სხვა უწყებაში არსებულ პრობლემას სისტემურად შევხედოთ“,- განაცხადა ლაშა თორდიამ.
გენერალურმა აუდიტორმა პრეზიდენტს აუდიტის სამსახურის მხარდაჭერისთვის მადლობა გადაუხადა.
ლაშა თორდიამ 13 მაისს, შარდენის ქუჩაზე მომხდარ ინციდენტზე დაწყებულ გამოძიებაზეც გააკეთა კომენტარი. „ფარცხალაძე-თორდიას საქმეში, ჯერჯერობით არანაირი სტატუსი არ მაქვს, შსს-ს ბოლო ბრიფინგიდან უფრო ბრალდებულის სტატუსი მეკუთვნის, ვიდრე დაზარალებულის“, - აღნიშნა თორდიამ.
