ეს არასერიოზული განცხადებაა, - ასე გამოეხმაურა პარლამენტის თავმჯდომარე ირაკლი კობახიძე საქართველოს ახალგაზრდა იურისტთა ასოციაციის საპარლამენტო მდივანის, სოფიო ჭარელის განცხადებას, რომლის თანახმადაც, კონსტიტუციის პროექტის საყოველთაო-სახალხო განხილვაზე ფიქსირდებოდა საჯარო სამსახურში დასაქმებული პირების მობილიზება და მათთვის წინასწარ დაწერილი კითხვების გადაცემა, რაც შემდგომში საყოველთაო-სახალხო განხილვისას დისკუსიის მმართველი პოლიტიკური ძალის სასარაგებლოდ წარმართვისკენ იყო მიმართული.
ირაკლი კობახიძის თქმით, სამწუხაროა კიდევ ერთხელ იმის გამეორება, რომ პრეზიდენტი პირველივე დღიდან იმ კამპანიაში იყო ჩართული, რომლის მიზანსაც კომისიის დისკრედიტაცია წარმოადგენდა.
„ეს არასერიოზული განცხადებაა. სამწუხაროა კიდევ ერთხელ იმის გამეორება, რომ პრეზიდენტი პირველივე დღიდან იმ კამპანიაში იყო ჩართული, რომლის მიზანსაც კომისიის დისკრედიტაცია წარმოადგენდა - ხელშემშლელი საქმიანობა პირდაპირ წარმოებული იყო და როცა საყოველთაო-სახალხო განხილვა დაიწყო, წინასწარ ვთქვი, რომ სპეციალური შეხვედრა იყო, რომელსაც პრეზიდენტის ადმინისტრაციის წარმომადგენელი ესწრებოდა და იმ შეხვედრაზე კონკრეტული, დესტრუქციული გეგმა შეთანხმდა, რომლის მონაწილე, სამწუხაროდ, პრეზიდენტის ადმინისტრაცია იყო. მაშინ ვამბობდი, რომ ეს გეგმა კონკრეტული სახით იქნებოდა განხორციელებული და ეს დესტრუქციული გეგმა როგორი იქნებოდა, ამას ყველანი ვნახავდით და ამ გეგმის კონკრეტული შედეგებიც ყველამ ერთად ვიხილეთ კიდეც. პოლიტიკური ძალების და სხვადასხვა სუბიექტების მხრიდან დესტრუქციული ნაბიჯები გადაიდგა. სამწუხაროა, რომ ამ ყველაფერში ჩართული იყო პრეზიდენტი და მისი ადმინისტრაცია. ეს ძალიან სამწუხარო დღის წესრიგია, რომლითაც საქართველოს პრეზიდენტი მოქმედებდა. ჩვენ ჩვენი პოზიტიური დღის წესრიგი გვაქვს.
ჩვენი ამოცანაა, დახვეწილი კონსტიტუცია მივიღოთ. ისეთი კონსტიტუცია, რომელიც სამართლებრივ პრინციპებთან სრულ შესაბამისობაში იქნება და რომელიც ძალიან დახვეწილი საპარლამენტო მმართველობის ჩამოყალიბებას უზრუნველყოფს. ბუნებრივია, პრეზიდენტის და მისი ადმინისტრაციის ნეგატიური დღის წესრიგი ამ ამოცანის შესრულებაში ხელს ვერ შეგვიშლის.
ძალიან დახვეწილი დოკუმენტია და ამაზე ვენეციის კომისიის შესაბამისი დასკვნა გვექნება. დოკუმენტი სამართლებრივ პრინციპებთან სრულ შესაბამისობაშია და ძალიან დახვეწილი მმართველობის სისტემა ყალიბდება, რომელიც გრძელვადიან პერსპექტივაში, ყოველგვარ ავტოკრატიას გამორიცხავს, განსხვავებით დღეს მოქმედი კონსტიტუციისგან. ასეთ ვითარებაში, სუბიექტურ ინტერესებზე მორგებაზე საუბარი ნეგატიურ შეფასებას იმსახურებს", - აღნიშნა კობახიძემ.
