უკრაინის უმაღლესი რადას თავმჯდომარე ანდრიი პარუბი საქართველო-უკრაინა-მოლდოვის საპარლამენტთაშორისო ასამბლეის შექმნის მნიშვნელობაზე საუბრობს.
აღნიშნულ საკითხზე უკრაინის რადას თავმჯდომარემ ქართველ კოლეგა ირაკლი კობახიძესთან დღეს გამართული შეხვედრის შემდეგ ისაუბრა და ხაზი გაუსვა ორ ქვეყანას შორის ურთიერთობის გააქტიურებას.
"ბოლოს, საქართველოში, 2008 წლის დროს, რუსული აგრესიის შემდეგ ვიყავი და ვიგრძენი, როგორ ახლოს ვართ და როგორი ერთნაირი ემოციური რეაქცია გვაქვს იმ გამოწვევებზე, რომლებიც ჩვენს წინაშე დგას. ჩვენთვის ძალიან სასიამოვნო იყო საპარლამენტო ასამბლეის ტრიბუნიდან ქართველი ხალხისთვის დამოუკიდებლობის აღდგენიდან 26-ე წლისთავის მილოცვა. ჩვენ გვესმის, თქვენ რა მაღალი ფასი გადაიხადეთ და ვაცნობიერებთ, როგორი მნიშვნელოვანია ეს დღესასწაული თქვენთვის. ჩვენთვის ძალიან მნიშვნელოვანია, გავააქტიუროთ ურთიერთობები ქვეყნებს შორის და დარწმუნებული ვარ, საპარლამენტო არჩევანი ეს ის განზომილებაა, რომელიც შესაძლებლობას გვაძლევს, რომ უფრო სწრაფი ნაბიჯები გადავდგათ. ჩვენ სხვადასხვა სფეროში ძალიან დიდი პოტენციალი გვაქვს. მათ შორის უსაფრთხოების, ინფრასტრუქტურისა და ტრანზიტის სფეროებში. ამისთვის, საჭიროა, თანამშრომლობის სხვა ფორმატები მოვიძიიოთ", - აღნიშნა უკრაინის რადას თავმჯდომარემ.
პარუბი ვარშავაში გამართულ შეხვედრასაც გამოეხმაურა.
"ვარშავაში, ხანმოკლე შეხვედრაზე, რამდენიმე ფორმატი შევთავაზე საქართველო-უკრაინა-მოლდოვის საპარლამენტთაშორისო ასამბლეის შექმნასთან დაკავშირებით, რათა შევქმნათ ის მოედანი, რომელიც გვაერთიანებს და უფრო მობილურები გავხდებით ჩვენს ურთიერთობებში. უკრაინას ასეთი თანამშრომლობის გამოცდილება ლიტვასთან და პოლონეთან აქვს.
უკრაინა-მოლდოვა-საქართველოს ასამბლეამ შეიძლება, ეს თანამშრომლობა ბალტიის და შავი ზღვის რეგიონში შეავსოს, რომელიც მნიშვნელოვანია ტრანზიტულ, ეკონომიკური თანამშრომლობისა და ინფრასტრუქტურის აშენების სფეროებში. ჩემი აზრით, ამ სფეროს პოტენციალი არ არის ამოწურული. ეს ძალიან მნიშვნელოვანი და პერსპექტიული მიმართულებაა. ჩვენ უკრაინის საგარეო საქმეთა სამინისტროს კომიტეტის დონეზე შესაბამისი კონსულტაციები უკვე ჩავატარეთ. ვიცი, რომ ტარდება კონსულტაციები საქართველოსა და მოლდოვაში. ასამბლეის შექმნასთან დაკავშირებით საერთო გადაწყვეტილებაზე რაც უფრო მალე გავალთ, ეს იქნება მნიშვნელოვანი ნაბიჯი", - განაცხადა პარუბმა.
უკრაინის რადას ხელმძღვანელი ამერიკაში დაგეგმილ ვიზიტსაც ეხმაურება. "ჩვენ დავგეგმეთ, ერთიანი წერილით მივმართოთ შეერთებული შტატების სენატის სპიკერს საქართველოში, მოლდოვასა და უკრაინაში ვიზიტთან დაკავშირებით. ორ კვირაში, აშშ-ის ვიზიტით ვეწვევი და ჩვენი პარლამენტის სახელით ამ მოწვევას გადავცემ. ვფიქრობ, რომ ეს იქნება ძალიან მნიშვნელოვანი პირველი ნაბიჯები ჩვენი თანამშრომლობის გამყარებისკენ. იმედი მაქვს, რომ კონტაქტები გააქტიურდება. ჩვენ მოვილაპარაკეთ, რომ საქართველოს პარლამენტსა და უკრაინის უმაღლეს რადას შორის საფეხბურთო მატჩს გავმართავთ. ეს ნაბიჯები ჩვენი ურთიერთობების გაღრმავებისთვის ახალ სივრცესა და ახალ პერსპექტივებს გაგვიხსნიან", - დასძინა პარუბმა.
