უახლოეს მომავალში საქართველოს უკრაინის პრეზიდენტი, პეტრო პოროშენკო ეწვევა,- ამის შესახებ საქართველოს პარლამენტის თავმჯდომარემ ირაკლი კობახიძემ უკრაინელ კოლეგასთან, ანდრეი პარუბისთან შეხვედრის შემდეგ განაცხადა.
,,ძალიან მნიშვნელოვანია, რომ ეს ვიზიტი შედგა იმ ქვეყანაში, რომელიც ძალიან კეთილგანწყობილია უკრაინელი ხალხის მიმართ. ქართველ და უკრაინელ ხალხს საუკუნოვანი მეგობრობა გვაკავშირებს და ძალიან მნიშვნელოვანია, რომ ეს კარგი საფუძველი იმისთვის გამოვიყენოთ, რომ კიდევ უფრო მჭიდრო გავხადოთ პარტნიორობა ჩვენს სახელმწიფოებს შორის. ჩვენ აღვნიშნეთ დამოუკიდებლობის დღე, რამდენიმე დღის წინ, ჩავატარეთ ნატო-ს საპარლამენტო ასამბლეა და ძალიან გვიხარია, რომ ამ ორ ღირსშესანიშნავ თარიღს დაემთხვა უკრაინის უმაღლესი რადას თავმჯდომარის ვიზიტი საქართველოში. ჩვენი ქვეყნები ბოლო ათწლეულების განმავლობაში ერთმანეთს მუდმივად გვერდში ედგნენ და ეს თანადგომა ბუნებრივია გრძელდება და მომავალშიც აუცილებლად უნდა გაგრძელდეს. ძალიან გვიხარია, რომ ძალიან აქტიურ ფაზაში შედის ჩვენი ურთიერთობები“,- აღნიშნა პარლამენტის თავმჯდომარემ.
მისივე თქმით, შედგა არაერთი ძალიან მაღალი დონის ვიზიტი. ირაკლი კობახიძის განცხადებით უახლოეს მომავალში საქართველოს უკრაინის პრეზიდენტი, პეტრო პოროშენკო ეწვევა, რაც ბუნებრივია ჩვენს სახელმწიფოებს შორის დამატებითი მჭიდრო ურთიერთობების ჩამოყალიბებას შეუწყობს ხელს.
„ჩვენ გვაქვს საერთო გამოწვევები, რომელიც დაკავშირებულია რუსეთის აგრესიასთან. ჩვენ გვაქვს საერთო მიზნები და ამოცანები, რომელიც დაკავშირებულია ევროპულ და ევროატლანტიკურ ინტეგრაციასთან და ძალიან მნიშვნელოვანია ჩვენი თანადგომა, იმისათვის რომ ჩვენი საერთო მიზნები იყოს მიღწეული. ჩვენ გვქონდა ძალიან საინტერესო შეხვედრა, სადაც ვისაუბრეთ ურთიერთობების გაღრმავებაზე, მჭიდრო თანამშრომლობის ჩამოყალიბებაზე და გვქონდა საუბარი კონკრეტულ საკითხებზე, რომელმაც შეიძლება ხელი შეუწყოს ამ ურთიერთობების კიდევ უფრო გაღრმავებას. კიდევ ერთხელ დავადასტურეთ სრული მხარდაჭერა ერთმანეთის სუვერენიტეტის და ტერიტორიული მთლიანობის მიმართ, ერთმანეთის მხარდაჭერა იმ პროცესში, რასაც ევროპულ და ევროატლანტიკურ სტრუქტურებში ინტეგრაცია ქვია და კიდევ ერთხელ გავუსვით ხაზი იმას, რომ ძალიან მნიშვნელოვანია ჩვენი კოორდინირებული მუშაობა ამ მიზნების მიღწევისათვის“,- განაცხადა კობახიძემ.
მან მადლობა გადაუხადა უკრაინელ კოლეგას საქართველოში ვიზიტისათვის და მზადყოფნა გამოთქვა საქართველოს პარლამენტის სახელით, იმისთვის, რომ უკრაინისა და საქართველოს შორის ურთიერთობების უფრო ინტენსიურ ფაზაში გადასაყვანად ყველაფერი გაკეთდეს.
