აჭარის მთავრობის თავმჯდომარე ზურაბ პატარაძე თბილისში ნატო-ს საპარლამენტო ასამბლეის საგაზაფხულო სესიას ესწრება. პლენარულ სხდომაზე სიტყვით გამოვიდნენ საქართველოს პრეზიდენტი გიორგი მარგველაშვილი, პრემიერ-მინისტრი გიორგი კვირიკაშვილი და პარლამენტის თავმჯდომარე ირაკლი კობახიძე. მომხსენებლებს შორის იყვნენ ქართველი მინისტრები და სამოქალაქო სექტორის წარმომადგენლები. ნატო-ს საპარლამენტო ასამაბლეა ნატო-ს წევრი და პარტნიორი ქვეყნების 360-მდე პარლამენტარს აერთიანებს. პლენარულ სხდომამდე, შაბათი და კვირა კომიტეტების მუშაობას, დისკუსიებსა და მოხსენებებს დაეთმო. ღონისძიების დასკვნით დღეს დელეგაციის წევრები ოფიციალურ დეკლარაციას მიიღებენ, სადაც საქართველოს მხარდაჭერაზე იქნება საუბარი. დეკლარაციას წარადგენს ასამბლეის ვიცე-პრეზიდენტი რასა იუკნევიჩენე, ლიტვის ყოფილი თავდაცვის მინისტრი და ამჟამად საკუთარი ქვეყნის სეიმის დეპუტატი. საქართველო ნატოს მუხუთე არაწევრი ქვეყანაა, სადაც საპარლამენტო ასამბლეის სესია იმართება. სესიაში, რომელიც ოთხი დღეა მიმდინარეობს, 600-მდე სტუმარი იღებს მონაწილეობას, მათ შორისაა ნატო-ს წევრი და პარტნიორი ქვეყნების 300-ზე მეტი პარლამენტარი.
