არასამთავრობო ორგანიზაციებმა, თვითმმართველი ქალაქების გაუქმების შესახებ მთავრობის ინიციატივასთან დაკავშირებით, პრემიერ-მინისტრ გიორგი კვირიკაშვილს შეხვედრა სთხოვეს. წერილი მთავრობის ადმინისტრაციაში დღეს შევიდა:
"29 მარტს 126-მა საზოგადოებრივმა და მედიაორგანიზაციამ და 18 მაისს 21-მა არასამთავრობო ორგანიზაციამ გაავრცელა განცხადებები - მოსაზრებები დაგეგმილ ცვლილებებასთან დაკავშირებით. ძირითადი მოთხოვნა საკითხის მომზადების და განხილვის პროცესში ჩართულობის უზრუნველყოფა იყო. სამწუხაროდ, ამ და სხვა ადგილობრივი ორგანიზაციების განცხადებების თუ მოქალაქეების მიერ გამოთქმული მოსაზრებების მიუხედავად, რეფორმაზე მსჯელობა მხოლოდ ხელისუფლების შიგნით გრძელდება. პრაქტიკულად იგნორირებულია საქართველოს კანონმდებლობით და თვითმმართველობის ევროპული ქარტიით განსაზღვრული ყველა მოთხოვნა მსგავს რეფორმაზე კონსულტაციის პროცესებთან დაკავშირებით", - წერია მიმართვაში.
მესამე სექტორი მოუწოდებს პრემიერს, უახლოეს პერიოდში გამონახოს დრო იმისთვის, რომ ქვეყნის დემოკრატიზაციისთვის უაღრესად მნიშვნელოვან რეფორმაზე არასამთავრობო სექტორის წარმომადგენლებთან ერთად იმსჯელოს.
"დაუყოვნებელ აუცილებლობად მიგვაჩნია, ქვეყნის მთავრობის მეთაურს პირადად გაგაცნოთ როგორც გასაერთიანებელი მუნიციპალიტეტების მოსახლეობის, ზოგადად საზოგადოების და იმ არასამთავრობო ორგანიზაციების მოსაზრებები, რომლებიც წლებია თვითმმართველობის საკითხებზე ვმუშაობთ. მოგმართავთ თხოვნით, დავნიშნოთ შეხვედრა, სადაც მიმდინარე რეფორმაზე ჩვენს, ჩვენი პარტნიორების მოსაზრებებს და მოსახლების განწყობებს გაგიზიარებთ", - ნათქვამია წერილში.
მიმართვას ხელს აწერენ: ფონდი ღია საზოგადოება - საქართველო, სამართლიანი არჩევნებისა და დემოკრატიის საერთაშორისო საზოგადოება, საქართველოს სტრატეგიული კვლევებისა და განვითარების ცენტრი, რეგიონის განვითარების ცენტრი, ადგილობრივი დემოკრატიის ქსელის ცენტრი, კივიტას გეორგიკა, სამოქალაქო კულტურის საერთაშორისო ცენტრი, საქართველოს მედიაკლუბი, მმართველობითი სისტემების განვითარების ცენტრი, ადამიანის უფლებათა ცენტრი, დემოკრატიული ჩართულობის ცენტრების ქსელი, საქართველოს ახალგაზრდა იურისტთა ასოციაცია, საერთაშორისო გამჭვირვალობა - საქართველო.
