საქართველო ძალიან განსაკუთრებული ასპირანტი ქვეყანაა- განაცხადა ნატო-ს გენერალური მდივნის მოადგილემ ქართველი დეპუტატის ირაკლი ბერაიას კითხვაზე დაპასუხოდ, რომელიც საქართველო-ნატო-ს სამომავლო ურთიერთობებს ეხებოდა.
„მადლობა ნატო-ს ყველა წევრს იმ ძლიერი მხარდაჭერისათვის, რომელსაც იჩენთ საქართველოს მიმართ. ჩვენ თქვენი დახმარებით გადავდგით მნიშვნელოვანი ნაბიჯები ნატო-სთან და ევროკავშირთან ინტეგრაციის გზაზე და ჩვენ შევძელით ჩვენი საკმაოდ მრავალპლანოვანი დემოკრატიული რეფორმის გეგმები განგვეხორციელებინა. თქვენ იცით, რომ საქართველოს საკმაოდ წონადი წვლილი შეაქვს ანტიტერორისტულ ბრძოლაში. ჩვენი ჯარის ნაწილები განლაგებულია ავღანეთში და შეაქვთ წვლილი ავღანეთში სამხედრო ოპერაციების წარმოებაში და ეს გახლავთ ყველაზე მაღალი წარმომადგენლობა საქართველოს საჯარისო ნაწილებისა და ნატოს წევრ ქვეყნებს შორის და ჩვენ ეს ყველაფერი იმედს გვაძლევს, რომ საქართველო წინ წაიწევს თავისი გაერთიანების და გაწევრიანების გზაზე. რას გვეტყოდით ამის შესახებ?“ - აღნიშნა ირაკლი ბერაიამ.
როგორც როუზ გოტემოლერმა აღნიშნა, საქართველოს დიდი წვლილი შეაქვს ალიანსის ქმედებებში.
„მინდა, მივმართო საქართველოს, თქვენ ხართ ძალიან განსაკუთრებული ასპირანტი ქვეყანა. წევრობის მოსურნე ქვეყანა, თქვენ დიდი წვლილი შეგაქვთ ალიანსის ქმედებებში. ავღანეთი არაერთხელ იქნა ნახსენები და მესმის, რომ 25 თქვენი ახალგაზრდა ჯარისკაცი დაიღუპა ამ ბრძოლებში. საქართველომ ძალიან მაღალი რანგის ფასი გადაიხადა ამისათვის და მინდა, გამოვუცხადო თანაგრძნობა დაღუპული ახალგაზრდების ოჯახებს. საქართველოს კიდევ ექნება გასაკეთებელი საქმე, რომ თავისი საჯარისო დანაყოფები გაცილებით უფრო მაღალ დონეზე აიყვანოს, როგორც წვრთნის კუთხით, ასევე ინსტიტუციონალური სტრუქტურის კუთხით და უამრავი რეფორმაა გასატარებელი ამ კუთხით საქართველოში და ამიტომ მიხარია,რომ არის შესაბამისი გუნდი და ნატოსაც ყავს შესაბამისი გუნდი ადგილობრივ ჩვენს ოფისში და მთელი ამ ქვეყნების წარმომადგენლები, რომლებიც ამ დარბაზში იმყოფებიან, მზად არიან დაეხმარონ საქართველოს ესოდენ მნიშვნელოვან ეტაპზე. არ შემიძლია დღეს გარკვეული წინასწარი განცხადებები გავაკეთოთ, მაგრამ ის რომ საქართველო პოზიტიური მიმართულებით მიდის ამას ვადასტურებთ მტკიცედ“, - განაცხადა გოტემოლერმა.
