მედიაპლურალიზმი, „რუსთავი 2“-ის საქმე და სასამართლო სისტემის გამოწვევები - ამ თემებზე ისაუბრა ნატო-ს საპარლამენტო ასამბლეის პოლიტიკის კომიტეტის სხდომაზე „ევროპული საქართველოს“ ერთ-ერთმა წევრმა გიორგი კანდელაკმა, რომელმაც აღნიშნულ საკითხებზე შეკითხვა საჯარო გამოსვლისას საგარეო საქმეთა მინისტრს დაუსვა.
გამოსვლის დასრულების შემდეგ, მიხეილ ჯანელიძემ ოპოზიციის წარმომადგენელი საერთაშორისო პარტნიორების წინაშე ქვეყნის იმიჯის დაზიანებაში დაადანაშაულა. თავად გიორგი კანდელაკმა კი აღნიშნავს, რომ ნატო-ს საპარლამენტო ასამბლეის წევრები თავადაც ფლობენ ინფორმაციას ქვეყანაში არსებული პრობლემების შესახებ.
,,ნატოს საპარლმენტო ასამბლეა არ არის ის ფორმატი, სადაც სრული მასშტაბით უნდა შემოვიტანოთ ჩვენი შიდაპოლიტიკური დისკუსიები, მაგრამ, სამწუხაროდ, მინისტრმა ჯანელიძემ იმდენად ვარდისფერ ფერებში დახატა სიტუაცია, რომ, გარკვეულწილად, უხერხულ მდგომარეობაშიც ჩაიყენა თავი. საპარლამენტო ასამბლეის წევრები ციდან ჩამოფრენილები არ არიან და იციან საქართველოში არსებული სიტუაცია. ხვალ ასამბლეა მიიღებს დეკლარაციას, რომელშიც მხარს დაუჭერს საქართველოს ევროატლანტიკურ ინტეგრაციას, მაგრამ ამავე დროს გარკვეულ შენიშვნებსაც გამოთქვამს”, - განაცხადა გიორგი კანდელაკმა.
