საქართველოს პრეზიდენტი გენერალური აუდიტორისა და ყოფილი მთავარი პროკურორის დაპირისპირების საქმეს შეეხო და განაცხადა, რომ ამ ყველაფერმა უკვე პოლიტიკური ელფერი შეიძინა.
როგორც დღეს გამართულ ბრიფინგზე პრეზიდენტის ადმინისტრაციის პრესსპიკერმა, ეკა მიშველაძემ აღნიშნა, შემთხვევა საფრთხეს უქმნის აუდიტის სამსახურის გამართულ ფუნქციონირებას.
"დღეს არსებული ინფორმაციის საფუძველზე უკვე შეიძლება ითქვას, რომ ეს ინციდენტი ცდება კრიმინალურ შემთხვევას და პოლიტიკური ელფერი შეიძინა. შესაბამისად, საქართველოს პარლამენტმა, როგორც მაკონტროლებელმა ორგანომ, განსაკუთრებული ყურადღება უნდა გამოიჩინოს საგამოძიებო პროცესის მიმართ. ამ გამოძიებას აქვს არა მხოლოდ სამართლებრივი, არამედ პოლიტიკური მნიშვნელობაც, ვინაიდან კიდევ ერთხელ ხაზგასმით აღვნიშნავთ, რომ საქმე სახელმწიფო უწყებების ეფექტურ ფუნქციონირებას ეხება. პრეზიდენტი, როგორც ქვეყანაში სახელმწიფო ორგანოთა ეფექტურად ფუნქციონირების გარანტი, ყურადღებით აკვირდება პროცესებს და მომავალშიც მიადევნებს თვალს მოვლენათა განვითარებას“, - განაცხადა ეკა მიშველაძემ.
