საქართველოს საგარეო საქმეთა სამინისტრო ოკუპირებულ აფხაზეთსა და რუსეთს შორის გაფორმებულ ე.წ. შეთანხმებას აპროტესტებს. უწყების განცხადებით, ეს ოკუპაციის კიდევ ერთი მკაფიო დასტურია.
"ე.წ. შეთანხმება სრულად უგულებელყოფს საერთაშორისო სამართლის ისეთ ფუნდამენტურ ნორმებსა და პრინციპებს, როგორებიცაა სახელმწიფოს სუვერენიტეტი, ტერიტორიული მთლიანობა და საერთაშორისოდ აღიარებული საზღვრების ურღვეობა. ეს არის რუსეთის ფედერაციის გამიზნული ქმედება, რომ ხელი შეუშალოს საქართველოს ხელისუფლების სამშვიდობო პოლიტიკას, რომელსაც მხარს უჭერს საერთაშორისო თანამეგობრობა. მსგავსი ქმედებები ხელს უწყობს რეგიონში ვითარების დესტაბილიზაციას, ასევე ზიანს აყენებს ჟენევის საერთაშორისო მოლაპარაკებებს.
საქართველოს ოკუპირებულ რეგიონებში მიმდინარე უკანონო პროცესები კიდევ ერთხელ ცხადყოფს მტკიცე და კონსოლიდირებული საერთაშორისო ძალისხმევის აუცილებლობას. მივმართავთ საერთაშორისო თანამეგობრობას, ქმედითი ზომები მიიღოს საქართველოს ოკუპირებული რეგიონების ანექსიის პრევენციისა და დეოკუპაციის მიზნით", -ნათქვამია სამინისტროს მიერ გავრცელებულ განცხადებაში.
შეგახსენებთ, რომ დღეს ოკუპირებულმა აფხაზეთმა და რუსეთის შინაგან საქმეთა სამინისტრომ ე.წ. შეთანხმება გააფორმეს. მათი მიზანია დანაშაულის წინააღმდეგ კოორდინაცია და ერთობლივი ბრძოლა.
