საქართველოს პარლამენტმა „თამბაქოს კონტროლის შესახებ“ საკანონმდებლო პაკეტი მესამე მოსმენით დაამტკიცა.
დეპუტატებმა საპარლამენტო უმრავლესობის წევრის, გუგული მაღრაძის მიერ მომზადებულ ცვლილებებს კენჭი დღევანდელ პლენარულ სხდომაზე უყარეს. საკანონმდებლო პაკეტს მხარი 85-მა დეპუტატმა დაუჭირა, წინააღმდეგ კი ერთი წავიდა.
საკანონმდებლო პაკეტით დაწესებული შეზღუდვები ძალაში 2018 წლიდან შევა. კერძოდ, პარლამენტის მიღებული გადაწყვეტილებით, 2018 წლის 1-ლი იანვრიდან, თამბაქოს ნაწარმის სადა შეფუთვასა და კოლოფზე თამბაქოს მოხმარების შედეგად გამოწვეული დაავადებების ფოტოების - პიქტოგრამების დატანა სავალდებულო იქნება.
ასევე, 2018 წლის 1-ლი მაისიდან, ყველა დახურულ სივრცეში, თამბაქოს ნაწარმის - ელექტრონული სიგარეტისა და ჩილიმის მოწევა აიკრძალება. სიგარის მოწევა შესაძლებელი მხოლოდ სიგარ-ბარებში იქნება, სიგარ-ბარის გასახსნელად კი საჭირო სპეციალური ლიცენზიის მოპოვება იქნება. ამას გარდა, 2018 წლის 1-ლი მაისიდან თამბაქოს ნაწარმის რეკლამაც აიკრძალება.
